Башҡортостан «Китап» нәшриәте Мәскәүҙә IX «Ҡыҙыл майҙан» китап фестивалендә ҡатнаша

2-6 июндә Мәскәүҙә илдең иң ҙур әҙәби фестивале — IX «Ҡыҙыл майҙан» китап фестивале ойошторола.  Унда 400-ҙән ашыу нәшриәт ҡатнаша.

Зәйнәб Биишева исемендәге Башҡортостан «Китап» нәшриәте ошо китап фестиваленә йыл да бара. Быйыл нәшриәт хеҙмәткәрҙәре 2 мең дананан ашыу китап — фәнни-популяр, балалар өсөн, тарихи, нәфис әҙәбиәт, һүҙлектәр, календарҙар тәҡдим итергә йыйына.

Нәшриәттең продукцияһын «Рәсәй Төбәктәре» павильонында — 16-сы сатырҙа табырға мөмкин.

«Башинформ» яҙғанса, май аҙағында Өфөлә тәүге тапҡыр «Китап байрамы» халыҡ-ара китап йәрминкәһе уҙҙы. Йәрминкәлә Рәсәйҙең 16 төбәгенән һәм 6 илдән бөтәһе 206 ойошма ҡатнашты.

https://www.bashinform.ru/news/culture/2023-06-01/bashkirskoe-izdatelstvo-kitap-primet-uchastie-v-ix-knizhnom-festivale-krasnaya-ploschad-v-moskve-3283868