Өфөнөң «Мираҫ» йыр һәм бейеү ансамбле Татарстандың баш ҡалаһында «Хазина» тигән үҙенсәлекле программа менән сығыш яһай. Концерт 14 мартта Ленин исемендәге мәҙәни-ял итеү комплексында була. Был хаҡта «Башинформ» агентлығына Өфө хакимиәтенең мәҙәниәт һәм сәнғәт буйынса идаралығынан хәбәр иттеләр.
Концерт программаһында «Сатыр эргәһендә», «Йыуаса», «Салауатҡа дан!» башҡорт йыр-бейеү композициялары, «Оҫта ҡуллы ҡыҙҙар», «Солтанаҡов», «Берҙәм ғаиләлә» бейеүҙәре, «Өлгөр» дәртле татар вокаль-хореография композицияһы, «Силифке» төрөк бейеүе, «Хава нагила» йәһүд композицияһы, ҡурай һәм ҡыл-ҡумыҙ моңдары, шулай уҡ башҡа донъя халыҡтары йырҙары һәм бейеүҙәре бар.
«Хазина» концерт-театрлаштырылған тамашаһы Ырымбур, Силәбе, Ҡурған, Екатеринбург, Пермь, Ҡазан ҡалаларында, Ямал-Ненец һәм Ханты-Манси автономиялы округтары ҡалаларында күрһәтелә.