Өфөләрҙе Ватанды һаҡлаусылар көнө уңайынан «Геройҙарыбыҙ өсөн» тигән концертҡа саҡыралар

21 февралдә Республика халыҡ ижады үҙәгенең Мәҙәниәт йортонда Ватанды һаҡлаусылар көнөнә бағышланған «Геройҙарыбыҙ өсөн» тигән концерт була.

Концерт программаһында «Гармония» академик йыр студияһы, «Сударушка» халыҡ йыр ансамбле, «Ауаз» башҡорт фольклор ансамбле, «Дуҫтар тауышы» эстрада йыры студияһы, «Селтәр» башҡорт костюмы студияһы, «Умырзая» халыҡ йыр ансамбле, «Инь-Янь» бейеү студияһы, «Аманат» халыҡ бейеүҙәре ансамбле һәм «Тинтино» балалар йыр театры ҡатнаша. Тамашасылар өсөн йырсы, йырҙар авторы, республика, халыҡ-ара фестивалдәр лауреаты Зилиә Бәхтиева, башҡорт һәм татар эстрадаһы йырсыһы Гөлназ Фәхертдинова башҡарыуында музыкаль композициялар яңғырай.

«Ватанды һаҡлаусылар көнө — мөһим дата, сөнки был көндә беҙ ата-бабаларыбыҙҙың батырлыҡтарын иҫкә төшөрәбеҙ, Ватанды һаҡлаусыларҙың ҡаһарманлығына ихтирамыбыҙҙы белдерәбеҙ. Концерт геройҙарыбыҙға арналған. Республика халыҡ ижады үҙәгенең Мәҙәниәт йортоноң ижади коллективтары һәм солистары сығыш яһай», — тип хәбәр итте «Башинформ»ға Республика халыҡ ижады үҙәгенең Мәҙәниәт йорто филиалы мөдире Заһир Ишкинин.

Концерт киске сәғәт 6-ла башлана. Адресы: Кустарная урамы, 17. Инеү ирекле.

0+

https://www.bashinform.ru/news/culture/2023-02-17/ufimtsev-priglashayut-na-besplatnyy-kontsert-ko-dnyu-zaschitnika-otechestva-dlya-nashih-geroev-3147410