Ҡаҙағстанда башҡорт яҙыусыһының пьесаһы буйынса спектакль сәхнәләштерелде

Ҡаҙағстандың Ҡыҙыл Урҙа йәштәр театрында башҡорт яҙыусыһы Флүр Ғәлимовтың «Прометей. Олимптың ҡолауы» пьеаһы буйынса спектаклдең премьераһы булды. Пьесаны билдәле ҡаҙаҡ режиссеры, Ҡаҙағстандың атҡаҙанған сәнғәт эшмәкәре Онталап Нурмаханов сәхнәгә сығарған.

«Прометей. Олимптың ҡолауы» — кешелек үҫешенең төп осорҙарын сағылдырған драматургик трилогияһының («Прометей. Олимптың ҡолауы», «Салауат тураһында йыр» һәм «Бафомет менән брудершафт») беренсе өлөшө.

— «Прометей»ҙа төп геройҙың утыҙ мең йыл тотҡонлоҡтан һуң азат ителеүе һәм кешелектең иудаизм динен алыуы күрһәтелә. Ҡаҙағстандың Фараби исемендәге халыҡ-ара әҙәби премияһына лайыҡ булған «Салауат тураһында йыр» трагедияһында башҡорт халҡының Салауат Юлаев етәкселегендә азатлыҡ өсөн көрәше сағылдырыла.  «Бафомет менән брудершафт»  кешелектең хәҙерге тормошо һүрәтләнә, — тип һөйләне автор.

Флүр Ғәлимов — Башҡортостандың халыҡ яҙыусыһы, Башҡортостандың һәм Рәсәйҙең атҡаҙанған мәҙәниәт хеҙмәткәре, Фараби исемендәге халыҡ-ара әҙәби премия, Рәсәйҙең ҙур әҙәби премияһы, В. Катаев исемендәге әҙәби премия лауреаты. 15 китап авторы, шуларҙың дүртәүһе «Китап» нәшриәтендә баҫылған, ә ҡалғандары алыҫ һәм яҡын сит илдәрҙә донъя күргән.

https://www.bashinform.ru/news/culture/2023-02-16/v-kazahstane-postavili-spektakl-po-piese-bashkirskogo-pisatelya-3146179