Тәскирә Даянованың балалар өсөн китабы Брайль шрифты менән баҫылған

Башҡортостандың М. Төхвәтшин исемендәге һуҡырҙар өсөн махсус китапханаһының тифлонәшриәт бүлегендә Тәскирә Даянованың «Ағинәй юлы» китабы донъя күрҙе. Ул Брайль шрифты менән баҫылған. Башҡорт телендәге китап рельефлы һүрәттәр менән биҙәлгән.

Башҡорт балалар яҙыусыһы, драматург, Башҡортостанндың Яҙыусылар ойошмаһы ағзаһы, Рәшит Әхтәри һәм Мәхмүт Ҡашғари исемендәге премиялар лауреаты Тәскирә Байрам ҡыҙы Даянова 1948 йылдың 10 ғинуарында Мәсетле районында тыуған.

Авторҙың әҫәрҙәре халыҡ телендә яҙылған һәм еңел уҡыла. Изгелек һәм яуызлыҡ, хәҙерге проблемалар кеүек темаларҙы яҙыусы геройҙарҙың тормош образдары аша асып бирә, уҡыусыны уйланырға һәм һығымта яһарға этәрә. Тәскирә Даянованың әҫәрҙәре ябайлығы һәм ихласлығы, милли, ғаилә идеалдарына бирелгәнлеге, урта һәм өлкән йәштәге мәктәп балаларына аңлайышлы булыуы менән айырылып тора.

Техник эшкәртеү процесынан һуң китап һуҡырҙар өсөн китапхана фондына һәм республика ҡалаларында махсус китапхана филиалдарына таратыла. 

https://www.bashinform.ru/news/culture/2023-01-10/detskaya-kniga-taskiry-dayanovoy-napechatana-reliefno-tochechnym-shriftom-braylya-3099624