9 һәм 10 ноябрҙә Ырымбур өлкәһенең Максим Горький исемендәге дәүләт драма театры сәхнәһендә Мәжит Ғафури исемендәге Башҡорт академия драма театрының спектаклдәре күрһәтелә.
Театрҙың матбуғат хеҙмәтенән хәбәр итеүҙәренсә, гастролдәр репертуарында — өс спектакль. Башҡорт театры коллективы Ырымбур тамашасыларына һуңғы йылдарҙағы премьераларҙы тәҡдим итә:
9 ноябрҙә киске сәғәт 7-се 30 минутта — «Зөләйха күҙҙәрен аса» (Гүзәл Яхина романы буйынса, инсценировка авторы — Ярослава Пулинович, режиссеры — Айрат Абушахманов).
10 ноябрҙә көндөҙгө 12-лә — «Әмилә» (Н. Крашенинниковтың романы буйынса Азалия Балгазина инсценировкаһында, пластика буйынса режиссер — Алина Мостаева).
10 ноябрҙә киске 7-се 30 минутта «Һинһеҙ килгән яҙҙар» (Зифа Ҡадирова, режиссеры — Айрат Абушахманов).
Хәтерегеҙгә төшөрәбеҙ, ошо көндәрҙә Башҡорт драма театры сәхнәһендә Ғ.Камал исемендәге Татар академия драма театры сығыш яһай.