Башҡортостан һәм Өфө яңылыҡтары
53.77
0
56.36
0
111.63
+2.6
15+ °C
Болотло
Бөтә яңылыҡтар
Мәҙәниәт
20 Май , 11:30

Республикала Ҡаһым түрә музейы булдырылды

Башҡортостан Республикаһы Мәҙәниәт министрлығының матбуғат хеҙмәте
Фото:Башҡортостан Республикаһы Мәҙәниәт министрлығының матбуғат хеҙмәте

Стәрлетамаҡ районы Мырҙаш ауылы мәҙәниәт йортонда 1812 йылғы Ватан һуғышы геройы Ҡаһым түрәнең тарихи-этнографик музейы булдырылды. Был хаҡта Башҡортостан Республикаһы Мәҙәниәт министрлығының матбуғат хеҙмәте хәбәр итте.  

Ҡаһым түрәнең яңы тарихи-этнографик музейы ете бүлектән тора: башҡорт (Мырҙаш ауылында), рус (Рязановка), мордва (Садовка), татар (Талас), украин (Золотоношка), сыуаш (Ишпарс), ҡаҙаҡ ( Октябрьский).

Мырҙаш ауылында урынлашҡан төп музей 1812 йылғы Ватан һуғышында һәм 1813-1814 йылдарҙа рус армияһының сит ил походтарында ҡатнашҡан башҡорт полктары командиры Ҡаһым түрәгә арналған.

Ҡаһым түрә (Ҡаһым Мырҙашев, 1778 –1813) Стәрлетамаҡ районы Айыусы ауылында тыуған. Уның героик фигураһы башҡорт ғәскәрҙәренең 1812 йылғы Ватан һуғышында алған хәрби даны менән айырылғыһыҙ бәйле. Айыусыла Ҡаһым түрә хөрмәтенә стела, башҡорт халыҡ йыры «Ашҡаҙар»ға һәйкәл ҡуйылған.

Хәтерегеҙгә төшөрәбеҙ, 2022 йылда ил Рәсәйҙең 1812 йылғы Ватан һуғышында еңеүенә 210 йыл тулыуҙы билдәләй. Унда 28 атлы башҡорт полкы һәм Өфө пехота полкы ла ҡатнашҡан.

Әлеге ваҡытта экспозицияларҙы тулыландырыу, саралар планын төҙөү эше алып барыла. Учреждениены Республика көнөндә, 2022 йылдың 11 октябрендә, асыу күҙаллана.

https://www.bashinform.ru/news/culture/2022-05-19/v-bashkortostane-sozdan-muzey-kahyma-turi-2810909

Автор:Ләйлә Аралбаева
Читайте нас в