Башҡортостан һәм Өфө яңылыҡтары
60.45
+0.07
61.7
+0.15
98.41
+1.01
26+ °C
Болотло
Бөтә яңылыҡтар
Мәҙәниәт
16 Февраль , 15:48

Өфөлә композитор һәм баянсы Илшат Яхин вафат

Өфөлә композитор, баянсы, аранжировкалаусы, М. Кәрим исемендәге Милли йәштәр театрының музыка бүлеге мөдире, Башҡортостандың атҡаҙанған сәнғәт эшмәкәре Илшат Яхин 48 йәшендә генә донъя ҡуйған. Хеҙмәттәштәре хәбәр итеүенсә, коронавирус менән ауырығандан һуң уға инсульт булған.

Илшат Яхин Учалы районында тыуған. 1988 йылда Өфө музыка мәктәп-интернатында уҡый башлай (хәҙер Ғ.Әлмөхәмәтов исемендәге Башҡорт республика гимназия-интернаты). Өфө сәнғәт училищеһының музыка факультетын (баян класы) тамамлай (уҡытыусыһы З.Ф. Мөслимов). 1992 йылда Заһир Исмәғилев исемендәге Өфө дәүләт сәнғәт институтына, баян класы буйынса уҡырға инә (педагогтары Р.Р. Рәхимов, М.И. Ғәйнетдинов).

Студент сағында уҡ Яхин Сибай дәүләт филармонияһында халыҡ уйын ҡоралдары оркестры етәксеһе булып эшләй башлай. Сибай филармонияһы коллективы менән Францияла, Грецияла, Белгород, Ташкент, Сәмәрҡәнд ҡалаларында халыҡ-ара фестивалдәрҙә ҡатнаша.

2001 йылдан Илшат Яхин — Башҡорт дәүләт филармонияһында «Карауанһарай» фольклор-эстрада төркөмө аккомпаниаторы-концертмейстеры. 2005 йылда филармонияның музыка бүлеге мөдире итеп тәғәйенләнә.

Илшат Яхин спектаклдәрҙең музыкаль әҫәрҙәре авторы булараҡ республика театрҙары менән хеҙмәттәшлек итә башлай. Театр режиссерҙары менән һөҙөмтәле эшләү Яхинды театрға алып килә. 2011 йылдан Илшат Яхин М.Ғафури исемендәге Башҡорт академия драма театрының музыка бүлеге мөдире булып эшләй.

Илшат Ғәббәс улы — композитор һәм аранжировкалаусы, шулай уҡ Истанбулда Башҡортостан Республикаһы көндәрен (2008 йыл), балалар араһында «Байыҡ» республика башҡорт бейеүен башҡарыусылар конкурсының гала-концерттарын (йыл һайын), «Башҡорт йыры» телевизион конкурсының гала-концертын музыкаль яҡтан биҙәй.

Композиторҙың һуңғы эш урыны — Мостай Кәрим исемендәге Милли йәштәр театры.

Илшат Яхин кинола ла әүҙем эшләне. «Бәхет ҡошо», «Сируси» сериалдары, «Өс хат», «Кластан тыш дәрес» кеүек ҡыҫҡа метражлы фильмдарҙың композиторы.

Илшат Яхин ижади ғаилә башлығы ине, уның  ҡатыны — Башҡорт дәүләт филармонияһының художество етәксеһе, хореограф Сулпан Асҡарова һәм ике балаһы ҡалды.

«Башинформ» мәрхүмдең туғандарының һәм яҡындарының ауыр ҡайғыһын уртаҡлаша.

https://www.bashinform.ru/news/culture/2022-02-16/v-ufe-skoropostizhno-skonchalsya-kompozitor-i-bayanist-ilshat-yahin-2695184

Автор:Ләйлә Аралбаева
Читайте нас в