Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-3 °C
Болотло
Бөтә яңылыҡтар
Мәҙәниәт
28 Декабрь 2021, 10:27

Баш ҡалала Шәйехзада Бабич исемендәге республика йәштәр премияһы тапшырылды

Республика Хөкүмәте йортонда 2019-2020 йылдар өсөн әҙәбиәт, сәнғәт һәм архитектура өлкәһендә Шәйехзада Бабич исемендәге республика дәүләт йәштәр премияһын тапшырыу тантанаһы уҙҙы.

Фәйзи Ғәскәров исемендәге дәүләт халыҡ бейеүҙәре ансамбле артисы Айбулат Баһауетдинов премияға Марат Кәримовтың «Салауат» хореография спектаклендә эшләгән һәм хореография сәнғәтен популярлаштырған өсөн лайыҡ булды.

Азат Вәлитовҡа премия Мәжит Ғафури исемендәге Башҡорт дәүләт академия драма театры спектаклдәрендә ролдәрҙе юғары профессиональ башҡарғаны өсөн бирелде: Игнатов (Гүзәл Яхинаның шул уҡ исемдәге романы буйынса Ярослава Пулиновичтың «Зөләйха күҙҙәрен аса»), Прометей (Мостай Кәримдең «Ташлама утты, Прометей!»), Айсыуаҡ (Ҡадир Даяндың «Таңсулпан» пьесаһы буйынса Дамир Йосоповтың «Гөлбостан»).

Рәсәйҙең һәм Башҡортостандың Яҙыусылар союзы ағзаһы, дүрт шиғри йыйынтыҡ авторы Александр Хватков премияға әҙәбиәт өлкәһендәге юғары ижади ҡаҙаныштары, Башҡортостан әҙәбиәтен үҫтереүгә һәм йәштәрҙе рухи яҡтан тәрбиәләүгә ҙур өлөш индергән өсөн лайыҡ булды.

Наградаларҙы Башҡортостан Республикаһы Хөкүмәте премьер-министры урынбаҫары Азат Бадранов тапшырҙы.

«Республикала иң яҡшыларҙы тантаналы рәүештә ҡотлау традицияһы барлыҡҡа килде. Бөгөн сәнғәткә, әҙәбиәткә, тимәк, республикабыҙ үҫешенә тос өлөш индергәндәрҙе билдәләйбеҙ. Комиссия ағзалары араһында премия лауреаттары бик күп, был иһә премияның артабан үҫеү өсөн баҫҡыс булыуы тураһында һығымта яһарға мөмкинлек бирә», – тип билдәләне Азат Бадранов.

Премия Башҡортостан мәҙәниәтен үҫтереүгә үҙ өлөшөн индергән йәш яҙыусыларға, рәссамдарға, артистарға, музыканттарға, архитекторҙарға һәм режиссёрҙарға ике йылға бер тапшырыла. Быйыл бөтәһе 13 эш ҡабул ителде. Һәр премияның күләме – 150 мең һум.

Автор:Ләйлә Аралбаева
Читайте нас: