Башҡортостанда 112-се Башҡорт кавалерия дивизияһы яугире Исмәғил Хажинға мемориаль таҡтаташ асылды

Межгорье ҡалаһында 112-се Башҡорт кавалерия дивизияһы яугире Исмәғил Мөхәмәтхажи улы Хажинға мемориаль таҡтаташ асылды, уға арналған митинг үтте. Башланғыстың авторҙары – Башҡорт ҡоролтайының урындағы бүлексәһе һәм музыкант, йәмәғәт эшмәкәре Вилмир Әбүбәкеров.

Башҡорт ҡоролтайының матбуғат хеҙмәте хәбәр итеүенсә, тантанала геройҙың балалары – Башҡортостан Республикаһының атҡаҙанған халыҡ мәғарифы хеҙмәткәре Вәкил Хажин, педагогик хеҙмәт ветераны Шәрғиә Хажина, ейәндәре – Башҡортостан Республикаһының мәғариф министры Айбулат Хажин, Эльвира Яҡшыдәүләтова, Флүрә Танһыҡужина, Шәүрә Нәғимова ҡатнашты. Абруйлы ҡунаҡтар – медицина фәндәре докторы, Бөтә донъя башҡорттары ҡоролтайы Президиумы ағзаһы Марсель Тойғонов, Башҡорт дәүләт университетының Башҡортостан тарихы, археология һәм этнология кафедраһы доценты Нурислам Ҡалмантаев, Рәсәйҙең атҡаҙанған, Башҡортостандың халыҡ артисы Рәмил Ғәйзуллин, Межгорье ҡалаһының почетлы гражданы Вәрис Шәнгәрәев та яугирҙе хөрмәтләп иҫкә алды.

Балалары уның тураһында түбәндәге хәтирәләр менән бүлеште: «Атайым һуғыш тураһында һөйләргә яратманы. Ул ныҡ диндар кеше ине, һуғыш, миҙалдар, ордендар тураһындағы һорауҙарға: «... Һуғыш – ҡанлы, дәһшәтле, ҡурҡыныс ғәмәл, Аллаһы Тәғәлә һеҙгә һәм балаларығыҙға уны күрһәтмәһен. Ә наградалармы? Минең өсөн иң ҙур награда – һеҙ: ғаиләм, ҡатыным, балаларым!».

Исмәғил Мөхәмәтхажи улы Хажин 1901 йылдың 19 сентябрендә Белорет районы Бирҙеғол ауылында тыуған. 1942 йылда үҙенең аты менән фронтҡа киткән. Миңлеғәле Шайморатов етәкселегендә 112-се Башҡорт кавалерия дивизияһында хәрби юлын башлаған. Фронттан 1945 йылдың авгусында әйләнеп ҡайтҡан. Ул ҡатыны Сәлимә Әхтәм ҡыҙы менән бергә балаларына юғары белем биргән, уларҙың бишәүһе уҡытыусы булып киткән. Исмәғил Мөхәмәтхажи улы корпус командиры генерал-майор М. Константиновты, дивизия командиры Г. Беловты, полк командиры Т. Күсимовты шәхсән белгән. Уларҙы һәр саҡ ғорурланып, һоҡланып иҫкә алған. Исмәғил Хажин 1996 йылда вафат булған, Белорет районы Бирҙеғол ауылында ерләнгән.