«Сулпылар» телеконкурсы финалы һәм Гала-концерты: Өфөлә яңы йондоҙҙар ҡабынды

— Бөгөн ошо сәхнәгә сыҡҡан ҡыҙҙар-малайҙар киләсәктә Башҡортостаныбыҙҙың сәнғәтен бөтә донъяға танытыр. Һеҙҙең ихлас сығышығыҙҙы тыңлағанда ҙур ҡыуаныс кисерҙем. Рәхмәт һеҙгә, балалар! — тине күренекле композитор, «Сулпылар» конкурсының жюри ағзаһы Рим Хәсәнов, Стәрлетамаҡтан 10 йәшлек Рамазан Биккининға Гран-при тапшырып.

— Бөгөн балалар етди репертуар башҡарҙы. Йәш таланттарҙың халыҡ йырҙарына өҫтөнлөк биреүенә шатмын, — тип тәьҫораттары менән бүлеште йырсы Нәзифә Ҡадирова. — Нисәнсе йыл инде «Сулпылар» конкурсында жюри булараҡ ҡатнашам, балаларҙың беренсе турҙан финалға тиклем үҫеүен күрәм. Уларҙың һәләте, маҡсатҡа ынтылышы миңә көс-дәрт бирә.

Жюриҙа шулай уҡ билдәле йырсы, «Юлдаш плюс» йәштәр интернет-радиоһы етәксеһе Илнур Рамазанов, Милли йәштәр театры актеры, Башҡортостандың халыҡ артисы Венер Камалов, «Мираҫ» ансамбле солисы, Башҡортостандың атҡаҙанған артисы Венера Юлгилдина эшләне.

Дәүләт Думаһы депутаты, Бөтә донъя башҡорттары ҡоролтайы Президиумы рәйесе Эльвира Айытҡолова, Башҡорт телен һаҡлау һәм үҫтереү фонды директоры Гөлназ Йосопова, «Башҡортостан» дәүләт телерадиокомпанияһы директоры урынбаҫары Тәнзилә Үлмәҫбаева, «Ҡурай» телеканалы етәксеһе Рита Өмөтбаева балаларға махсус бүләктәр тапшырҙы.