Егет һәм хан ҡыҙы, батыр һәм Аждаһа, Юха һәм Шайтанға әүерелгән меҫкен егет – өс мөғжизәле әкиәт персонаждары, илгиҙәр актерҙар Таңсулпан һәм Зөһрә Бураҡаеваларҙың күңелле «Арба»һында ауылдар һәм ҡалалар буйлап йөрөй. 11 ноябрҙә иртәнге сәғәт 11-ҙә һәм 1-ҙә улар Мостай Кәрим исемендәге Милли йәштәр театрының Ҙур сәхнәһенә килә.
Бында балалар өсөн спектаклдең премьераһы була, артистар менән бергә йырларға, бейергә мөмкин. Ҡуйыусы режиссер – Зиннур Сөләймәнов.
Ҡуйыусы төркөмдә: ҡуйыусы рәссам – Рөстәм Баймөхәмәтов, композитор – Диләрә Ғәбитова (Мәскәү ҡалаһы), музыкаль яҡтан биҙәүсе – Башҡортостандың атҡаҙанған сәнғәт эшмәкәре Илшат Яхин, хореограф – Александр Родионов.
Премьерала Башҡортостандың атҡаҙанған артистары Рәмзил Сәлмәнов һәм Илгиз Таһиров, театр актерҙары Лилиә Исҡужина, Ләйсән Миңлеғәлиева, Салауат Юлдашбаев, Шәһит Хамматов, Зөлхизә Абдуллина, Гөлсәсәк Зарипова, Зәриә Моратова, Әбйәлил Үтәбаев сығыш яһай.