Өфөлә башҡорт сәхнәһе легендаһы Фидан Ғафаров үҙенең концерттарына саҡыра

Башҡорт сәхнәһе легендаһы, актер һәм йырсы Фидан Ғафаров үҙенең концерттарына саҡыра. Мәжит Ғафури исемендәге Башҡорт драма театрының күренекле актеры, Башҡортостандың, Татарстандың һәм Рәсәйҙең халыҡ артисы, Салауат Юлаев исемендәге дәүләт премияһы лауреаты, Өфө ҡалаһының почетлы гражданы ижади эшмәкәрлегенә 55 йыл тулыуҙы билдәләй.

Концерттар 12 һәм 13 октябрҙә Мәжит Ғафури исемендәге Башҡорт драма театры сәхнәһендә була. Фидан Ғафаров коллегалары, Рәсәйҙең, Башҡортостандың һәм Татарстандың халыҡ артисы Нурия Ирсаева, Башҡортостандың халыҡ артистары Светлана Хәкимова, Илдар Ғүмәров һәм башҡалар менән дуэттар башҡара. Шулай уҡ улы, Башҡортостандың халыҡ артисы Азамат Ғафаров һәм ҡыҙы Самира йырлай. Концертты Милена Сираева һәм Башҡортостандың атҡаҙанған артисы Артур Ҡунаҡбаев алып бара.

Кисәнең сценарий авторы Динара Ҡәйүмова һөйләүенсә, программала тамашасыларҙың яратҡан йырҙары — «Ҡыҙыл паша» спектакленән «Бик һағындым һине, тыуған илем!», «Бергә йәшәү – бүләк», «Өфө йүкәләре», «Юҡҡа түгел» һәм башҡалар яңғырай. Бер нисә яңы йырҙың премьераһы әҙерләнә. Актер үҙенең тормошо һәм ижады тураһында үҙе һөйләй.