«Мин өйөмә ҡайтам» – Рифҡәт Исрафилов Ырымбур театрының Өфөләге гастролдәре тураһында

Мәжит Ғафури исемендәге Башҡорт академия драма театрында М. Горький исемендәге Ырымбур дәүләт өлкә драма театрының гастролдәре башланды. Алмаш гастролдәр «Ҙур гастролдәр» федераль программаһы сиктәрендә ойошторолған. Башҡорт драма театры Ырымбурҙа 2019 йылда – үҙенең 100 йыллыҡ юбилейы йылында уҡ сығыш яһағайны, хәҙер ырымбурҙар беҙгә килде, тип хәбәр итте М.Ғафури исемендәге Башҡорт академия драма театры директоры Иршат Фәйзуллин, матбуғат конференцияһын асып. Ул ике театр араһындағы бәйләнештәрҙе күптәнге, туғандаш булыуын билдәләне.

Гастролдәр Ырымбур театрының – 165, театрҙың художество етәксеһе, Рәсәйҙең халыҡ артисы, күп йылдар Башҡорт драма театрын етәкләгән Рифҡәт Исрафиловтың 80 йәшенә бағышлана. Өфө һәм Ырымбур театрҙары актеры, Рәсәйҙең атҡаҙанған артисы Олег Ханов та ҡотлауҙар ҡабул итә. Ул үҙенең 70 йәшен билдәләне.

Гастроль афишаһында – һуңғы йылдар репертуарындағы иң шәп спектаклдәр. Бөтә труппа – 50-нән ашыу кеше, шулай уҡ Ырымбур институтының театр факультеты студенттары ҡатнаша.

10 сентябрҙә Өфө тамашасылары Рәсәй драматургы Ярослава Пулиновичтың Рифҡәт Исрафилов ҡуйған «Земля Эльзы» романтик мелодрамаһын ҡарарға мөмкин. 2020 йылда Рәсәйҙең атҡаҙанған артисы Надежда Величко Ырымбур өлкәһе губернаторының «Йылдың иң яҡшы актерлыҡ эше» премияһына лайыҡ булды.

11 сентябрҙә Александр Федоров сәхнәләштергән «Боинг-Боинг» комедияһы күрһәтелә (М. Камолетти). Рифҡәт Исрафилов әйтеүенсә, режиссерҙың заманса трактовкаһы бигерәк тә йәштәргә ҡыҙыҡлы булмаҡсы.

12 сентябрҙә гастролдәр Лопе де Веганың «Собака на сене» комедияһы менән тамамлана (Рифҡәт Исрафилов сәхнәләштергән).