«Ашҡаҙар» радиоһында тематик көндәр башланды

Кисә «Ашҡаҙар» радиоһы эфиры башҡорт халҡының бөйөк «Урал батыр» эпосына арналды. Көнө буйына «Башҡортостан радиоһының алтын фонды»нан тапшырыуҙар яңғыраны.

«Тыңлаусыларыбыҙ иртәнән беҙҙең үлемһеҙ «Урал батыр» эпосынан өҙөктәр тыңланы. Шулай уҡ эфирҙа күп ваҡытын ошо әҫәрҙе өйрәнеүгә арнаған билдәле ғалимдар – фән докторҙары Фәнүзә Нәҙершина, Гөлнур Бохарова, Розалиә Солтангәрәева тураһында очерктар яңғыраны. Мәктәп уҡыусылары эпостан өҙөктәрҙе яттан һөйләне. Йырҙар ҙа махсус һайлап алынды. Күренекле композиторҙарыбыҙ Хөсәйен Әхмәтов, Морат Әхмәтов әҫәрҙәре. Беҙгә күп шылтыраталар. Тыңлаусыларыбыҙ киләһе йылды «Урал батыр» йылы тип атарға, ошо әҫәрҙе өйрәнеү буйынса махсус грант уйлап табырға, Өфөлә Урал батырға һәйкәл ҡуйырға тәҡдим итә», — тип үҙенең тәьҫораттары менән уртаҡлашты «Ашкадар» радиоһы етәксеһе Гәүһәр Батталова.

Һәр кесаҙна «Ашҡаҙар» радиоһы эфиры бер темаға арнала. Киләһе аҙнала көн 49 башҡорт ырыуына бағышлана.