Өфөлә асыҡ һауала генерал Шайморатов тураһында спектакль күрһәтелә

27 августа Өфө амфитеатрында («Торатау» конгресс-холы янында) «Ат уйнатып алдан бара» спектакле сәхнәләштерелә. Спектакль легендар генерал, Рәсәй Геройы Миңлеғәле Шайморатовтың тыуған көнөнә һәм данлыҡлы 112-се Башҡорт кавалерия дивизияһы атлыларына арнала. Киске сәғәт 8-ҙә башлана.

Хәтерегеҙгә төшөрәбеҙ, Мәжит Ғафури исемендәге Башҡорт академия драма театры 112-се Башҡорт кавалерия дивизияһының күренекле полководецы, генерал-майор, Рәсәй Геройы Миңлеғәле Шайморатов тураһында спектакль ҡуйғайны. «Ат уйнатып алдан бара» спектакленең премьераһы 2020 йылдың 19 һәм 20 ноябрендә булды. Драматург — Зөһрә Бураҡаева, проекттың художество етәксеһе — Айрат Абушахманов, ҡуйыусы режиссер — Хөрмәтулла Үтәшев. Спектакль Башҡортостандың Милли музейы һәм архивы, Хәрби-тарихи музейҙар, Әмир Абдразаҡов исемендәге «Башҡортостан» киностудияһы фондтарында һаҡланған документаль сығанаҡтарға нигеҙләнеп яҙылған.

«Был спектаклде Стәрлетамаҡта асыҡ һауала күрһәткәйнек инде. Тамашала декорациялар күп түгел, экран ҡуйыла, шуға күрә спектаклдә сәхнә биҙәлеше йәһәтенән үҙгәрештәр булмай. Тауышҡа килгәндә, һәр актерға мини гарнитура беркетелә», — тине Башҡорт драма театрының әҙәби бүлеге етәксеһе Эльвира Дәүләтбирҙина.

https://www.bashinform.ru/news/1633357-v-ufe-spektakl-o-generale-shaymuratove-pokazhut-v-formate-open-air/