«Тамыр» йәш дуҫтарын «Йырлы донъя Нурбостан» байрамына саҡыра

12 апрелдә, Космонавтика көнөндә, «Тамыр» балалар-үҫмерҙәр телеканалы йәш дуҫтарын «Йырлы донъя Нурбостан» байрамына саҡыра. Былтыр Башҡортостан Республикаһы Башлығы грантына башҡорт телендә тәүге «Нурбостан» анимация сериалы төшөрөлдө.

«Күп йылдар хыялланған проектты былтыр ғына тормошҡа ашыра алдыҡ, — ти «Тамыр» телеканалы директоры Гөлназ Ҡолһарина. — Пандемия шарттарында уҙған йылда йәш тамашасылар менән онлайн – Башҡортостан юлдаш телевидениеһының тура эфирында осраштыҡ. Ләкин беҙ «Нурбостан» байрамында йәнле аралашыуҙы, сериалдың үҙенсәлекле геройҙары һәм тарихы менән таныштырыуҙы мөһим тип һанайбыҙ. Анимация сериалының икенсе миҙгелен төшөрөү өсөн дә мөмкинлек булыр тип өмөтләнәбеҙ».

«Нурбостан» анимация сериалының беренсе миҙгеле 12 сериянан тора. Сағыу геройҙар, башҡорт легендалары һәм традициялары буйынса мауыҡтырғыс сюжеттар, юморға бай файҙалы мәғлүмәт, өҫтәл уйыны, социаль селтәрҙә ойошторолған конкурстар, «НУРТИН-банк» уйыны – быларҙың барыһы ла балалар өсөн бик ҡыҙыҡлы.

Әлеге ваҡытта «Тамыр» телеканалы командаһы Бөтә донъя башҡорттары ҡоролтайы саралары барышында «Нурбостан»ды республика райондарында һәм Рәсәй төбәктәрендә күрһәтә.

«Йырлы донъя Нурбостан» байрамы «Башҡортостан» дәүләт концерт залында була. Йәш тамашасыларҙы «Тамыр» телеканалының йыр студияһы, «Сулпылар» конкурсы еңеүселәре һәм республиканың бейеү ансамлдәре ҡатнашлығындағы концерт, шулай уҡ уйындар, бүләк уйнатыу, СТЕРХ икмәк комбинатынан тәм-томдар көтә.