Башҡортостан һәм Өфө яңылыҡтары
89.82
+0.12
99.72
+0.52
71.06
-1.63
10+ °C
Болотло
Баш
Рус
Eng
Бөтә яңылыҡтар
Мәҙәниәт
23 Март 2021, 17:43
Өфө «Нур» татар театры ҡатын-ҡыҙҙың ауыр яҙмышы хаҡында «Фатима» спектакленә саҡыра
Өфө «Нур» татар дәүләт театры Зифа Ҡадированың «Көтөп уҙған ғүмер» повесы буйынса «Фатима» спектаклен сәхнәләштерҙе. Премьера 26, 27, 28 мартта була.
Учалы районында тыуып үҫкән Зифа Ҡадированың ижады башҡорт һәм татар әҙәбиәтен һөйөүселәргә яҡшы таныш. Уның әҫәрҙәре буйынса спектаклдәр Рәсәйҙең бик күп театрҙарында уңышлы бара. Повесть буйынса инсценировка авторы – Гөлнур Усманова.
«Спектакль өсөн повестың Фатиманың ауыр тормошо бәйән ителгән беренсе бүлеге һайланған. Бында ҡатын-ҡыҙ һәм уның оло мөхәббәте генә түгел, ә илдең, тотош дәүерҙең тарихы һүрәтләнә. Ваҡиғалар уҙған быуаттың 50-се йылдарында бара. Һуғыштан һуңғы ауыр йылдарҙа, аслыҡ-яланғаслыҡ осоронда Фатиманың бай эске донъяһын күрергә мөмкин. Ул күп һынауҙарға дусар булһа ла, бирешмәй, ә, киреһенсә, был уның холҡон сыныҡтыра», — тип һөйләне «Нур» театрының матбуғат секретары Гөлшат Сафина.
Спектаклдең режиссеры – «Нур» театрының баш режиссеры, Башҡортостандың халыҡ артисы Азат Йыһаншин. Рәссам — Рәсәйҙең һәм Ҡалмыҡстандың атҡаҙанған сәнғәт эшмәкәре Валерий Яшкулов. Хореограф – Башҡортостан Республикаһының атҡаҙанған артисы Рәмизә Мөхәмәтшина.
Фатима ролен актрисалар Сулпан Раянова һәм Ирина Ғәниева башҡара. Фатиманың һөйгәне Михманды Динар Тимершәйехов һәм Марат Хәсәнов уйнай. Фатиманың әсәһе Хәсибә образында Башҡортостандың халыҡ артисы Финә Вәлиева һәм Айһылыу Ғүмәрова сығыш яһай.
Рәсәйҙең атҡаҙанған артисы, Башҡортостандың һәм Татарстандың халыҡ артисы Сәүиә Сираева һәм Башҡортостандың халыҡ артисы, Татарстандың атҡаҙанған артисы Рәсимә Ғәйфуллина яуыз Яҡуптың әсәһе ролен башҡара, ә Яҡупты Башҡортостандың атҡаҙанған артисы Альберт Шәрәфетдинов уйнай.
https://www.bashinform.ru/news/1572692-ufimskiy-tatarskiy-teatr-nur-priglashaet-na-spektakl-fatima-o-nelegkoy-sudbe-zhenshchiny/
Автор:
Ләйлә Аралбаева
Теги:
театр
Читайте нас: