Башҡорт асыҡ КВН лигаһы Сибайҙа һәм Мәсәғүттә ярымфиналсыларҙы һайлай

ӨФӨ, 2019 йыл, 15 ноябрь. /«Башинформ» мәғлүмәт агентлығы, Гөлфиә Акулова/. Башҡорт КВН-сылары республика ҡалаларында һәм райондарында хәрәкәтте үҫтереүҙе дауам итә. Башҡортостандың дәүләт телдәрен һаҡлауға һәм үҫтереүгә йүнәлтелгән республика башлығы гранты аҡсаһына Башҡорт асыҡ КВН лигаһы «Төньяҡ-көнсығыш», «Көньяҡ», «Урал аръяғы» һәм «Төньяҡ-Көнбайыш» лигалары форматында саралар уҙғара. Башҡорт асыҡ КВН лигаһы уйындары системаһында миҙгел өс конкурс этабынан тора: зона фестивале, ярымфинал уйындары, финал уйындары.

16 һәм 19 ноябрҙә Сибайҙа һәм Мәсәғүттә «Урал аръяғы» лигаһында ярымфинал уйыны була.

Беренсе ярымфинал уйыны 16 ноябрҙә көндөҙгө сәғәт 4-тә Сибайҙа Балалар ижады үҙәгендә уҙғарыла.

Икенсе ярымфинал уйыны 19 ноябрҙә Мәсәғүттә район мәҙәниәт йортонда була. Сәғәт 4-тә башлана.

Башҡорт асыҡ КВН лигаһы уйындары системаһы эшмәкәрлегенең маҡсаты – уйын формаһында башҡорт телен дәүләт теле булараҡ һәм Башҡортостан Республикаһының башҡа туған телдәрен һаҡлау, үҫтереү һәм популярлаштырыу.

Тулыраҡ мәғлүмәтте Бәйләнештәге төркөмдә алырға мөмкин.