Башҡортостанда Бөтә донъя фольклориадаһы уны уҙғарыу тарихында иң күләмлеһе булырға тейеш

ӨФӨ, 2019 йыл, 12 март. /«Башинформ» мәғлүмәт агентлығы/. 2020 йылдың йәйендә Башҡортостанда Бөтә донъя фольклориадаһы уны уҙғарыу тарихында иң күләмлеһе булырға тейеш, тип белдерҙе Федерация Советында Башҡортостан Республикаһы Дәүләт Йыйылышы — Ҡоролтай рәйесе Константин Толкачев.

12 һәм 13 мартта Федерация Советында Башҡортостан Республикаһы көндәре барышында Фән, мәғариф һәм мәҙәниәт комитетының киңәйтелгән ултырышына киләһе йылда VI Бөтә донъя фольклориадаһын үткәреүгә әҙерлек мәсьәләһе сығарылды.

«Фольклориада 2020 йылдың 18 июленән 1 авгусына тиклем ойошторола. Унда Башҡортостандың барлыҡ ҡала-райондары ҡатнаша. Ҡунаҡтар үҙҙәрен күрһәтә һәм республикала йәшәгән халыҡтарҙың мәҙәниәте, йолалары менән таныша ала, — тип хәбәр итте Константин Толкачев. — Республикабыҙҙа Бөтә донъя фольклориадаһы тарихта иң күләмлеһе булыр тип әйтергә мөмкин. Биш ҡитғанан вәкилдәр һәм 100-гә яҡын коллектив көтөлә. Бөгөнгә 73 илдән ғаризалар алдыҡ. Уларҙың 53-ө беҙгә килергә тейешле ижади коллективтарҙы билдәләгән дә инде».

Башҡортостанда фольклориада уҙғарыу тураһында ҡарар өс йыл элек ҡабул ителде. 2016 йылдың йәйендә Мексикала V Бөтә донъя фольклориадаһында республикабыҙға Бөтә донъя фольклориадаһы флагы тапшырылды. Башҡортостандың мәҙәниәт министры Әминә Шафиҡова һүҙҙәренсә, беҙҙең коллектив унда бик популяр булған.

«Башҡортостан Республикаһы — профессиональ һәм яуаплы төбәк. Быйыл ғинуарҙа беҙ CIOFF президенты Филипп Боссан менән бергә республика башлығы вазифаһын ваҡытлыса башҡарыусы Радий Хәбиров менән осраштыҡ һәм Башҡортостанда Фольклориаданың юғары кимәлдә үтеүенә шикләнмәйбеҙ», — тип ышана Рәсәй дәүләт халыҡ ижады йорто директоры Тамара Пуртова.

Әлеге ваҡытҡа биш фольклориада уҙғарылды. Уларҙың тәүгеһе 1996 йылда Голландияла, икенсеһе — 2000 йылда Японияла, 2004 йылда Венгрияла ойошторолдо.

2012 йылда дүртенсе Бөтә донъя фольклориадаһын Көньяҡ Корея ҡабул итте. Иҫәп буйынса бишенсе фольклориада 2016 йылда Мексикала үтте.