Өфөлә «Сулпылар» республика музыкаль телеконкурсы дуҫтарын йыйҙы

ӨФӨ, 2018 йыл, 28 декабрь. /«Башинформ» мәғлүмәт агентлығы, Ләйлә Аралбаева/. «Тамыр» балалар-үҫмерҙәр телеканалының иң күп һанлы һәм социаль әһәмиәтле проекты — «Сулпылар» республика музыкаль телеконкурсы үҙенең дуҫтарын йыйҙы.

Х.Әхмәтов исемендәге Башҡорт дәүләт филармонияһының ҙур залындағы байрам Ғаилә йылына арналды һәм «Сулпылар — бер ҙур ғаилә» тип аталды. Музыка донъяһына тәүге аҙым яһаған 12 финалсы башҡорт эстрадаһы йондоҙҙары менән бер сәхнәлә сығыш яһаны.

«Беҙҙең гала-концерт өсөн махсус рәүештә йондоҙҙар яңы йырҙар яҙҙырҙы, — ти проекттың продюсеры Асия Шахмина. — Венер Камалов үҙенең ҡыҙҙары менән яңы номер әҙерләне. Илнур Рамазанов бер туғаны менән сығыш яһаны. Диджей Хан — Булат Сарбаев сәхнәгә улы менән сыҡты. «Арғымаҡ» төркөмө, Гәлсәр Байғусҡарова, Сабина Кучаева, Лилиә Дауытова һәм башҡа йондоҙҙар балалар менән сағыу, йөкмәткеле номерҙар әҙерләне. Концертты программаның даими алып барыусыһы Алмаз Таһиров һәм уның атаһы алып барҙы».

Өсөнсө урынға бер юлы өс финалсы: Артур Асҡаров (Силәбе), Сәйҙә Гәрәйшина (Өфө), Сәлим Ғөбәйҙуллин (Хәйбулла районы) лайыҡ булды. Жюри икенсе урынды Гөлдәр Аллабирҙинаға (Хәйбулла районы) һәм Илнар Ғилметдиновҡа (Илеш районы) бирҙе. Беренсе урынды Ринат Ғаззалов (Әбйәлил районы) алды, ә конкурста Искәндәр Тазетдинов (Миәкә районы) еңде.

Байрам «Сулпылар» өсөн махсус яҙылған гимн менән тамамланды.

Быйыл конкурс февраль айында башланды һәм өс этапта уҙҙы. Онлайн һайлап алыу турына 200-ҙән ашыу ғариза килде. Видеороликтарҙы иғтибар менән ҡарағандан һуң жюри 70 конкурсантты беренсе турға саҡырҙы. Уларҙың 30-ы ғына икенсе турға үтте, ә финалға бөтәһе 12 бала сыҡты.

Быйыл жюри составында М.Кәрим исемендәге Милли йәштәр театры актеры, телевидение алып барыусыһы Венер Камалов, журналист, шағирә Гөлнара Хәлфетдинова һәм йырсы Илнур Рамазанов эшләне.

«Сулпылар» конкурсының гала-концерты 31 декабрҙә Башҡортостан юлдаш телевидениеһында көндөҙгө сәғәт 11-ҙә күрһәтелә.