Вторник, 12 Мая 2026

Уфа

+13 °С

Главное Иҡтисад Йәмғиәт Мәҙәниәт Барыһы ла Еңеү өсөн Сәйәсәт Спорт Хәл-ваҡиғалар

|Последние новости

Төп бит/Мәҙәниәт

07:00 (UTC+5), 18 Октября 2018

Театр сәхнәһендә тәүгә Башҡортостандың халыҡ шағиры Мостай Кәрим образы йәнләндерелде

Олег Яровиков

Ләйлә Аралбаева

ӨФӨ, 2018 йыл, 18 октябрь. /«Башинформ» мәғлүмәт агентлығы, Ләйлә Аралбаева/. Өфөлә Мостай Кәримдең тормошо һәм ижады тураһында күптән көтөп алынған «Мостай Кәрим. Яҡын офоҡ» спектакленең премьераһы уҙҙы. Спектаклде Башҡорт ҡурсаҡ театры Башҡортостандың халыҡ шағирының быуат юбилейы алдынан сәхнәгә сығарҙы – 2018 йылдың 20 октябрендә уның тыуыуына 99 йыл тула.

Бөтә төп тормош этаптарында Мостай Кәрим образы тәүгә театр сәхнәһендә тормошҡа ашырылды. Шағир ролендә – йәш актер Вадим Ғәбиҙуллин, уның хәләл ефете Рауза – Рәйлә Ғизәтуллина. Сәхнәлә яҙыусының замандаштары һәм ҡәләмдәштәре, яҡындары һәм дуҫтары йәнләндерелә. Спектакль драма театры, ҡурсаҡ театры, пластик театр, кинодокументалистика һәм әҙәбиәт ҡатышмаһынан тора. Ваҡиғалар һәм фәлсәфәүи текстар хәҙерге театр теле менән бирелгән. Режиссер — Альберт Имамутдинов, рәссамдар — Әнисә Томаншина һәм Ильнур Слявчин, хореограф — Светлана Әйүпова, визуаль эффекттар буйынса рәссам — Урал Мәхийәнов.

«Беҙҙә бөгөн ҙур байрам – спекталь премьераһы. Уның өҫтөндә бик намыҫлы эшләнек. Проект идеяһы былтыр уҡ барлыҡҡа килде. Мостай Кәримдең тормош һәм ижад юлына, «Оҙон-оҙаҡ баласаҡ» повесына, уның шиғырҙарына таянып, Владимир Аношкин махсус рәүештә пьеса яҙҙы. Ул киносценарийға оҡшап торҙо. Беҙҙең алда ҡатмарлы бурыс торҙо - спектаклдә образлы ҡарар табыу, - тип һөйләне Альберт Имамутдинов. - Шағир иҫән саҡта уның менән күп аралашҡан проект консультанты Шәүрә Ғилманова беҙгә бөтә материалды йыйырға ярҙам итте».

Режиссер билдәләүенсә, был спектакль – эксперименталь, 12+ билдәһе аҫтында сыға. Спектаклде үҙенсәлекле сәхнәләштереү өсөн театр махсус рәүештә видеоанимация селтәре һатып алды. Проектты «Берҙәм Рәсәй» партияһының «Театрҙар балаларға» программаһы ярҙамында тормошҡа ашырып булды. Уның ярҙамы 4 миллион һумға яҡын тәшкил итте.

Спектаклдә Рәсәйҙең атҡаҙанған артисы, Башҡортостандың халыҡ артисы Фәтих Дәүләтбаев, Башҡортостандың атҡаҙанған артисы Гөлсәсәк Мөхәмәтшина, Марат Ғиниәтуллин һәм башҡалар уйнаны. Мостай тауышы менән Рәсәйҙең атҡаҙанған артисы, Башҡортостандың халыҡ артисы Олег Ханов һөйләне. Шиғырҙарҙы Рәсәйҙең һәм Башҡортостандың халыҡ артисы Айрат Әхмәтшин, Александр Верхоземский, Эмил Латипов, Артем Сәмиғуллин уҡыны.

Композитор – атҡаҙанған сәнғәт эшмәкәре Урал Иҙелбаев спектаклдең музыкаль биҙәлеше өҫтөндә эшләне, Г. Свиридов, А. Холминов, В. Агапкин, Р. Хәсәнов әҫәрҙәренән өҙөктәрҙе ҡулланып.

«Мостай Кәрим әҫәрҙәре өҫтөндә күп тапҡыр эшләнем - «Салауат», «Ҡыҙ урлау» спектаклдәренә музыка яҙҙым. Әммә был юлы ул бер нимәгә лә оҡшаш булманы. Миңә шағирҙың тормош юлына арналған проект өҫтөндә эшләү бик мауыҡтырғыс булды», — тип һөйләне Урал Иҙелбаев.

Спектаклде шағирҙың ҡыҙы Әлфиә Кәримова юғары баһаланы.

«Мин бик тәьҫирләндем, бер нисә тапҡыр күҙҙәрем йәшләнеп китте. Мине спектаклде сәхнәләндергәндә саҡырманылар, сюрприз эшләргә теләнеләр. Һеҙ иҫ киткес, шул! Атайымдың ижадына шул тиклем һаҡсыл ҡарағанығыҙ өсөн рәхмәт, - тине премьеранан һуң Әлфиә Мостай ҡыҙы. - Минеңсә, беҙҙең театр үҫешендә яңы дәүер башлана. Мин «Прометей», «Аҡ пароход» булған осорҙо иҫкә төшөрәм, һеҙ тағы ла ҙурыраҡҡа ирешә алаһығыҙ, һеҙҙең бик яҡшы коллектив».

Әлфиә Мостай ҡыҙы киләһе йылда спектакль Мостай Кәримдең 100 йыллығына арналған юбилей программаһының бер биҙәге буласаҡ тип билдәләне.

Театр фойеһында был кис Милли китапхана фондынан «Мостай Кәримдең әҙәби мираҫы», ҡурсаҡ театрында Мостай Кәрим әҫәрҙәре буйынса төрлө йылдарҙа ҡуйылған спектаклдәрҙән фотолар, афишалар һәм ҡурсаҡтар ингән «Мостай Кәрим һәм ҡурсаҡ театры» күргәҙмәләре эшләне. Шағирҙың Шишмә районынан яҡташтары шулай уҡ уникаль экспонаттар һәм һирәк фотолар менән күргәҙмә ойошторҙо һәм «Беҙҙең Мостай Кәрим» театрлаштырылған перформанс күрһәтте.

«Бөгөн был сарала Шишмә районы Мостай Кәримдең әҙәби мираҫы, шәхси альбомдарҙан уның уникаль фотолары менән таныштырҙы. Мәҙәниәт һарайының ижади коллективы ла ситтә ҡалманы, тамашасыларға уның әҫәрҙәренән өҙөктәр тәҡдим итте», — тип хәбәр итте район мәҙәниәт һарайы директоры Татьяна Хәбибуллина.

1 из 12

http://www.bashinform.ru/news/1225811-vpervye-na-stsene-teatra-ozhil-obraz-narodnogo-poeta-bashkortostana-mustaya-karima/

#ҡурсаҡ театры #мостай кәрим

Яңылыҡтарҙы тиҙерәк уҡыу өсөн социаль селтәрҙәргә ҡушылығыҙ:

Рубрикалар

Рубрикалар

Үҙебеҙҙекеләрҙе ташламайбыҙ

Медицина

Форматтар

Яңылыҡтар

Мәҡәләләр

Адрес

450077, Өфө, Киров урамы, 45 (347) 250-05-07

Рекламная служба

(347) 250-11-11 adv@bashinform.ru

Редакция

(347) 250-07-28 inf@bashinform.ru

© 1992-2026 «Башинформ» мәғлүмәт агентлығы» акционерҙар йәмғиәте. ТУ 02-01609 һанлы киң мәғлүмәт сараһын теркәү тураһындағы таныҡлыҡ Элемтә, мәғлүмәт технологиялары һәм киң коммуникациялар өлкәһендә күҙәтеү буйынса федераль хеҙмәттең Башҡортостан Республикаһы буйынса идаралығы тарафынан 2017 йылдың 25 сентябрендә бирелгән.

Об использовании персональных данных

Bashinform.ru сайтында баҫылған бөтә мәғлүмәттәр һәм мәҡәләләр халыҡ-ара һәм Рәсәй авторлыҡ хоҡуғы һәм уға бәйле хоҡуҡтар тураһындағы ҡануниәте менән яҡланған. «Башинформ» мәғлүмәт агентлығының бөтә хәбәрҙәре лә 18 йәштән өлкән ҡулланыусыларға тәғәйенләнгән.

18+

Мәҡәләләрҙе күсереп баҫҡанда, йә уларҙы өлөшләтә файҙаланғанда «Башинформ» мәғлүмәт агентлығына һылтанма яһау мотлаҡ. Интернет-баҫмалар һәм социаль селтәрҙәр өсөн тура актив гиперһылтанма мотлаҡ. «Башинформ» мәғлүмәт агентлығы логотибын мәҡәләләрҙе күсереп алғанда йәки цитаталар килтергәндә агентлыҡҡа һылтанма менән бәйле булмаған маҡсаттарҙа файҙаланыу өсөн «Башинформ» мәғлүмәт агентлығы акционерҙар йәмғиәтенең яҙма рөхсәте кәрәк.

«Башинформ» мәғлүмәт агентлығы логотибын ҡулланыу, сайттағы мәғлүмәттәрҙе һылтанма менән күсереп баҫыу һәм өлөшләтә ҡулланыу осраҡтарынан тыш, акционерҙар йәмғиәтенең яҙма ризалығы менән генә рөхсәт ителә.