Өфөлә Рәсәйҙә Футбол буйынса донъя чемпионатына арналған балеттың премьераһы уҙҙы
Валерий Шахов
ӨФӨ, 2018 йыл, 8 октябрь. /«Башинформ» мәғлүмәт агентлығы, Наталья Овчарук/. Тулы зал һәм футбол уйыны элементтары менән балет. Бындай тамашаның булғаны юҡ ине әле. Өфөлә Башҡорт дәүләт опера һәм балет театры сәхнәһендә «Футболға!» балетының премьераһы уҙҙы.
Балетты 29 артист, Мәскәү хореографы Алексей Ищук, композитор Руслан Мурсякаев, рәссам Ирина Дерябина һәм ҡуйыусы дирижер, Башҡортостандың атҡаҙанған сәнғәт эшмәкәре Герман Ким әҙерләп күрһәтте.
«Футболға!» балеты премьераһын «Өфө» футбол клубы тренерҙары һәм хеҙмәткәрҙәре ҡараны. Вильям Оливейра тамашаға ҡатыны менән килгән. Тамашасылар араһында республика командаһының баш тренеры Сергей Томаров та бар ине.
Өфөлә балеттың премьераһы Футбол буйынса донъя чемпионаты барышында күрһәтелергә тейеш булһа ла, техник сәбәптәр буйынса 7 октябргә күсерелде.