Стәрлетамаҡтың рус театры Макдонах фестивалендә «Матурлыҡ королеваһы»н күрһәтә

ӨФӨ, 2018 йыл, 7 август. /«Башинформ» мәғлүмәт агентлығы, Ләйлә Аралбаева/. Стәрлетамаҡ ҡалаһының рус дәүләт драма театры Макдонахтың III театр фестивалендә ҡатнаша.

Театр «Матурлыҡ королеваһы» спектаклен күрһәтә, тип хәбәр итә Башҡортостан Мәҙәниәт министрлығының матбуғат хеҙмәте.

Пьеса быйылғы фестивалдә иң популяр тамашаларҙың береһе булмаҡсы. Тамашасылар уның Ҡаҙағстан, Сыктывкар, Иркутск, Стәрлетамаҡ театрҙары башҡарыуында дүрт вариантын ҡарай ала.

Мартин Макдонах — Британия-Ирландия кинорежиссеры, сценарист, продюсер һәм драматург. Махдонах фестивале 1-7 октябрҙә Пермдә уҙа. 2014 һәм 2016 йылдарҙа ойошторолған тәүге ике фестиваль төрлө ил театрҙарының билдәле ирланд Макдонах сәнғәтен популярлаштырыуға ҙур ҡыҙыҡһыныу белдереүен күрһәтте.

Быйыл фестиваль Пермдең «У Моста» театрының 30 йыллығына бағышлана һәм тағы ла үҙенсәлеклерәк булырға вәғәҙәләй. Фестиваль программаһында – яңы танылған ҡатнашыусылар. Европалағы легендар театрҙарҙың береһе, Чехиянан ČINOHERNÍ KLUB «Безрукий из Спокэна» һәм «Палачи» спектаклдәрен күрһәтә. Тап ошо театр һәм чех режиссеры Ондрей Сокол Европаға драматург Макдонахты асты ла инде. Румыниянан ACT Theatre «Человек-Подушка» пьесаһын килтерә.

Бынан тыш, фестиваль программаһында Рәсәйҙең төп театр тәнҡитселәренең лекциялары һәм режиссерҙарҙың оҫталыҡ дәрестәре ҡаралған.

http://www.bashinform.ru/news/1194493-russkiy-teatr-sterlitamaka-pokazhet-korolevu-krasoty-na-festivale-makdonakha/