«Урал батыр» башҡорт халыҡ эпосы «Донъя халыҡтарының эпик ҡомартҡылары» китаптар серияһына ингән

ӨФӨ, 2018 йыл, 13 июль. /«Башинформ» мәғлүмәт агентлығы, Әлим Фәйезов/. Якутскиҙа Халыҡ-ара интеллектуаль уйындарҙа ҡатнашыусы Федерация Советының Фән, мәғариф һәм мәҙәниәт комитеты рәйесенең беренсе урынбаҫары Лилиә Ғүмәрова Саха (Яҡут) Республикаһы Дәүләт Йыйылышы рәйесе Александр Жирков һәм Сингапур Милли университеты һәм Наньянг технологик университеты профессоры, физика буйынса халыҡ-ара Азия олимпиадаһы президенты, Халыҡ-ара интеллектуаль уйындарҙың программа комитеты рәйесе Леонг Чуан Квек менән осрашты.

Әңгәмә барышында сенатор Уйындарҙы үткәреү өсөн рәхмәт әйтте һәм бындай форматтағы сара ил төбәктәрендә тәүгә ойошторолоуын билдәләне.

Осрашыуҙа ҡатнашыусылар Яҡут Республикаһының ЮНЕСКО менән «Донъя халыҡтарының эпик ҡомартҡылары» китаптар серияһын булдырыу буйынса берләштерелгән проект менән ҡыҙыҡһынды. Уның һөҙөмтәһендә яҡут теленә «Манас» ҡырғыҙ эпосы, «Маадай Хара» алтай эпик әҫәре, «Урал батыр» башҡорт халыҡ эпосы тәржемә ителгән. ЮНЕСКО-ның матди булмаған мираҫы тип танылған «Олонхо» яҡут героик эпосы бер нисә донъя халыҡтары теленә тәржемә ителгән.

«Олонхо ерендә донъя халыҡтары эпостары» халыҡ-ара эпик форумында төҙөлгән Үҙ-ара тәржемәләү тураһында килешеү сиктәрендә «Урал батыр» башҡорт халыҡ эпосы – яҡут теленә, ә «Олонхо» яҡут эпосы башҡорт теленә тәржемә ителгән. Форум 2015 йылдың июнь айында Яҡут Республикаһының баш ҡалаһында үтте.

http://www.bashinform.ru/news/1185732-bashkirskiy-epos-ural-batyr-voshel-v-knizhnuyu-seriyu-epicheskie-pamyatniki-narodov-mira/