«Евразия йөрәге-2018» барлыҡ ҡатнашыусыларҙың исемдәрен иғлан итте

8 июндә иртәнге сәғәт 11-ҙә Конгресс-холда «Башҡортостан, Урал һәм Волга буйы халыҡтарының милли кейемендә мәҙәниәттәр калейдоскобы» төбәк-ара ғилми-ғәмәли конференция уҙғарыла.

Кисен Башҡортостан Милли симфоник оркестрының Симфоник төнө була. Программа ҡунағы — Төньяҡ Осетия-Алания Республикаһының халыҡ артисы, бик күп халыҡ-ара конкурстар еңеүсеһе, шул иҫәптән «Алтын битлек» һәм «Алтын софит» эйәһе, шулай уҡ сәнғәт өлкәһендәге хеҙмәттәре өсөн Чехияның «EURO Pragensis Ars» Милли премияһы лауреаты, Ҙур театр солисы Вероника Джиоева. Киске сәғәт 8-ҙә башлана.

9 июндә көндөҙгө 4-тә Совет майҙанынан Башҡортостан халыҡтарының республика милли кейем байрамы башлана.

Кис көнө өфөләрҙе «UFA-KURAIFEST» фестиваленә саҡыралар. Ҡатнашыусылар: Линар Дәүләтбаев етәкселегендә Башҡортостандың Милли халыҡ уйын ҡоралдары оркестры, республиканың халыҡ артистары Азат Биксурин һәм Рушан Биктимеров, халыҡ-ара конкурстар лауреаттары Илнур Хәйруллин, Салауат Хәлимов, Илнур Һибәтуллин, Мәскәүҙән «ZAMAN» төркөмө. Шулай уҡ концертта төрки йәштәренең «Урал моңо-2018» халыҡ-ара музыкаль ижад конкурс-фестивале лауреаттары сығыш яһай.

Хедлайнер — төрлө уйын ҡоралдарында уйнаған Заһир Зәйнетдиновтың ZAINETDIN этно-шоуы, «Зәңгәр ҡош» Бөтә Рәсәй йәш таланттар конкурсы финалсыһы,оркестр ҡыҙыҡай Ләйсән Золотарева. Сәғәт 7-лә башлана.

10 июндә — З. Исмәғилев исемендәге Өфө дәүләт сәнғәт институтының 50 йыллығына ҡарата «Симфоник төн. Уҡыу йортона бағышлау». Юбилей концертында тамашасылар алдында йондоҙҙар — сәнғәт институтын тамамлаусылар һәм барлыҡ ижади коллективтар сығыш яһай. Сәғәт 8-ҙә башлана.

11 июндә – «Этнотөн». Фестиваль ҡунаҡтары: Ҡаҙағстандан «ULYTAU» этно-рок төркөмө, Бүрәт Республикаһынан «SHONO» һәм Мордовиянан «OYME». Хедлайнер — Грузиянан «Mgzavrebi» төркөмө. Киске 7-лә башлана.

12 июндә — фестивалдең гала-концерты. Музыкаль бүлек өсөн Башҡорт филармонияһының Башҡортостандың атҡаҙанған артисы Олег Ҡасимов етәкселегендә Эстрада-джаз оркестры яуап бирә. Кисә ҡунаҡтары — Американың виртуоз борғосоһо һәм йырсы Рональд Бейкери, Рәсәй йырсыһы, «Sugar Mamas» төркөмө йырсыһы булараҡ билдәле Анжелика Фролова, «Голос» телевизион проектында ҡатнашҡан Наҙгөл Отузова. Гала-концерттың махсус ҡунағы — «Пицца» төркөмө. Сәғәт 7-лә башлана.

http://www.bashinform.ru/news/1167747-festival-iskusstv-serdtse-evrazii-2018-obyavil-imena-vsekh-uchastnikov/