Башҡортостан Республикаһында Владимир Спиваков фонды академияһы проекты ҙур концерт менән башлана

ӨФӨ, 2018 йыл, 27 март. /«Башинформ» мәғлүмәт агентлығы, Ләйлә Аралбаева/. Өфөлә тантаналы рәүештә Башҡортостан Республикаһында Владимир Спиваков фонды академияһы проекты асыла. Сара 1 апрелдә сәғәт 4-тә «Башҡортостан» дәүләт концерт залында уҙа.

Концертта танылған музыканттар, Академия уҡытыусылары ҡатнаша: Александр Поволоцкий (скрипка, Израиль) — «Тель-Авив виртуоздары» солистар ансамбленә нигеҙ һалыусы, З. Метта етәкселегендәге Израиль филармония оркестры солисы; Екатерина Немирович-Данченко (фортепиано, Франция) — Париж һәм Тулуз консерваторияларынан саҡырылған профессор, «Алтын Орфей» премияһы эйәһе; Артур Нәзиуллин (кларнет, Рәсәй) — Башҡортостан Республикаһында В. Спиваков фонды директоры, Мәскәү дәүләт академия филармонияһы һәм Мәскәү өлкә филармонияһы программалары солисы, Башҡортостандың атҡаҙанған артисы; Сергей Бубнов (флейта, Рәсәй) — Рәсәйҙең атҡаҙанған артисы, В. Спиваков етәкселегендәге Милли филармония оркестрының флейталар төркөмө концертмейстеры; Игорь Лазарев (бас, Рәсәй) — Ҡалмыҡстан Республикаһының атҡаҙанған артисы, Гнесиндар исемендәге Рәсәй музыка академияһы уҡытыусыһы, А. Шнитке исемендәге Юғары музыка мәктәбе доценты; Леонид Друтин (саксофон, Рәсәй) — халыҡ-ара конкурстар лауреаты, Гнесиндар исемендәге Дәүләт музыка колледжының тынлы һәм һуҡма уйын ҡоралдары бүлеге етәксеһе.

Концертта Башҡортостандың сағыу таланттары ла ҡатнаша.

Хәтерегеҙгә төшөрәбеҙ, Академия 31 марттан алып 8 апрелгә тиклем эшләй. Төп саралар Өфө ҡалаһында уҙғарыла (Урта махсус музыка колледжы). Проект сиктәрендә концерттар һәм оҫталыҡ дәрестәре ойошторола — Академия уҡытыусылары Салауатҡа (В.Т. Спиваковтың йәш таланттар мәктәбе) һәм Учалыға (С. Низаметдинов исемендәге Учалы сәнғәт һәм мәҙәниәт колледжы) бара.

http://www.bashinform.ru/news/1134798-proekt-akademii-fonda-vladimira-spivakova-v-respublike-bashkortostan-nachnetsya-s-bolshogo-kontserta/