Республика ғалимдары IV Бөтә Рәсәй фольклорсылар конгресында ҡатнашты

ӨФӨ, 2018 йыл, 14 март. /«Башинформ» мәғлүмәт агентлығы, Ләйлә Аралбаева/. Тулала IV Бөтә Рәсәй фольклорсылар конгресы үтте. Ул яҙыусы һәм фольклорсы П.В. Киреевскийҙың тыуыуына 210 йыл тулыуға һәм А.Н. Веселовскийҙың 180 йыллығына арналды. Сарала донъяның 19 иленән һәм Рәсәйҙең 50 төбәгенән халыҡ мәҙәниәте буйынса 300-ҙән ашыу ғалим һәм белгес ҡатнашты. Программаға 16 секция, өс һүҙ көрәштереү майҙансығы, халыҡ мәҙәниәтен һәм ғилми баҫмаларҙы актуалләштереү буйынса проекттар менән таныштырыу инде.

Конгресс эшендә Башҡортостан вәкилдәре – Тарих, тел һәм әҙәбиәт институтының ғилми хеҙмәткәрҙәре Мираҫ Иҙелбаев, Розалиә Солтангәрәева, Гөлнур Хөсәйенова, Олеся Әхмәдрәхимова, Фәнирә Ғайсина, Айгөл Хәкимйәнова, Рәфилә Зиннурова ҡатнашты.

«Һайлап алыу ҡаты булды, алдан ебәрелгән ғаризалар буйынса саҡырҙылар. Беҙҙең делегация иҙ ҙурҙарҙың береһе – ете кеше булды. Был фольклорыбыҙҙың бай булыуы һәм һайланған темаларҙың көнүҙәклеге менән аңлатыла. Докладтарҙа башҡорт мифологияһы персонаждары, айырым әкиәттәрҙең күп төрлөлөгө, сәсәндәр-риүәйәтселәр, башҡорттарҙың йыр ижады хаҡында әйтелде, — тип һөйләне Башҡортостан Милли әҙәбиәт музейының ғилми хеҙмәткәре Олеся Әхмәдрәхимова. — Конгресс – халыҡ ижадының байлығын күрһәтеү, башҡа төбәктәрҙән коллегалар менән бәйләнештәр булдырыу мөмкинлеге биргән үҙенсәлекле майҙансыҡ ул».

Сара сиктәрендә этнографик, фольклор фильмдар күрһәтелде, экскурсиялар, концерттар, музейҙарға йөрөү ойошторолдо.

http://www.bashinform.ru/news/1127815-uchenye-bashkortostana-prinyali-uchastie-v-iv-vserossiyskom-kongresse-folkloristov/