Башҡортостанға мәҙәниәткә булышлыҡ итеүгә федераль ҡаҙнанан 81 миллион һум бүленгән

ӨФӨ, 2018 йыл, 28 февраль. /«Башинформ» мәғлүмәт агентлығы, Ләйлә Аралбаева/. «Бәләкәй Ватан мәҙәниәте» проектын тормошҡа ашырыу сиктәрендә Башҡортостанға федераль ҡаҙнанан 81 миллион һумдан ашыу бүленгән. «Берҙәм Рәсәй» партияһының Башҡортостан төбәк бүлексәһе матбуғат секретары Арина Рәхимғолова хәбәр итеүенсә, уларҙан 47 миллион – ауыл мәҙәниәт йорттарын яңыртыуға, 30 миллион самаһы – бәләкәй ҡалаларҙағы театрҙарға ярҙам итеүгә һәм 5 миллион балалар һәм йәштәр өсөн театрҙарҙы үҫтереүгә йүнәлтелә.

2018 йылда Башҡортостан Республикаһында проектта 15 мәҙәниәт йорто, биш бәләкәй ҡалалар театры һәм өс балалар һәм йәштәр өсөн театр ҡатнаша. Партия проекты сиктәрендә ауыл мәҙәниәт йорттарын һәм 50 меңдән кәм кеше йәшәгән тораҡ пунктарҙағы мәҙәниәт йорттарын йүнәтеү һәм яңыртыу, театрҙарҙың матди-техник базаһын нығытыу, техник һәм технологик ҡорамалдар һатып алыу, бәләкәй ҡалалар һәм балалар һәм йәштәр өсөн театрҙарҙың репертуарын сифатлы итеп яңыртыу күҙаллана.

«Берҙәм Рәсәй» партияһының «Бәләкәй Ватан мәҙәниәте» проектына урындағы халыҡ әүҙем йәлеп ителә, улар асыҡтан-асыҡ үҙ фекерен белдерә ала. Проекттың тағы ла бер бурысы – мәҙәниәт йорттарын һәм ауыл клубтарын яңыртыуға федераль, төбәк һәм урындағы бюджеттарҙан аҡса бүлеүҙе контролдә тотоу. 2017 йылда мәҙәниәт йорттарын модернизациялауға 46 миллион һумдан ашыу бүленгән, 32 объект яңыртылған. Бәләкәй ҡалалар театрҙарына айырым иғтибар бүленә. Былтыр театрҙарға булышлыҡ итеүгә федераль ҡаҙнанан 670 миллион һум бүленгән һәм йүнәлтелгән.

http://www.bashinform.ru/news/1122568-bashkortostanu-na-podderzhku-kultury-vydeleno-bolee-81-mln-rubley-iz-federalnogo-byudzheta/