Республиканың 100 йыллығы уңайынан фестиваль-марафонды Хәйбулла районы башлап ебәрҙе

ӨФӨ, 2018 йыл, 2 февраль. /«Башинформ» мәғлүмәт агентлығы, Наталья Овчарук/. 1 февралдә Хөсәйен Әхмәтов исемендәге Башҡорт дәүләт филармонияһында «Халыҡтар дуҫлығы һәм берҙәмлеге менән йәшәй йөҙйәшәр Башҡортостан!» фестиваль-марафоны башланды. Башҡортостан Республикаһы ойошторолоуҙың 100 йыллығына бағышланған сара ике йыл дауам итә. Тәүгеләрҙән булып Хәйбулла районы сығыш яһаны.

Холдағы күргәҙмәлә хәйбуллалар биҙәү-ҡулланма сәнғәтен тәҡдим итте, райондың социаль-иҡтисади үҫеше хаҡында һөйләне. Һуңғараҡ таныштырыу сараһына Хәйбулла районы башлығы Рәил Ибраһимов һәм республиканың мәҙәниәт министры Әминә Шафиҡова ҡушылды.

«Һеҙҙе Башҡортостан Республикаһы башлығы Рөстәм Хәмитов исеменән сәләмләйем һәм республика муниципаль берәмектәренең фестиваль-марафоны башланыуы менән ҡотлайым. Төбәктең һәр төбәге – ынйы. Республика ойошторолоуҙың 100 йыллығын байрам итеү барышында бик күп тарихи, ғилми саралар, 100 объект төҙөү, Башҡортостан ҡалалары һәм райондарында инфраструктураны яҡшыртыу ҡаралған», — тине Әминә Шафиҡова.

Хәйбулла районы ауыл хужалығындағы ҡаҙаныштарынан тыш, күренекле кешеләре менән дә дан тота. Уларҙың береһе — Башҡортостандың халыҡ шағиры Ҡәҙим Аралбай. Байрам концерты уның ижады менән башланып китте.

«Хәйбулла районы – минең тыуған төйәгем. Элек сиҙәм ерҙәрен үҙләштергәндәр. 1954 йылда иһә бында мал аҙығы әҙерләүҙә эшләгән һалдаттар килде, беҙ уларға ярҙам итә инек, — тип иҫенә төшөрҙө Ҡәҙим Аралбай. – Байтаҡ китаптар сығарҙыҡ. Бер йыл элек район энциклопедияһы донъя күрҙе. Башҡортостандағы барлыҡ райондарҙың да ошондай баҫмаһы юҡ. Бөгөн Хәйбулла районында мәктәпкәсә һәм урта белем биреү үҫешә, сөнки бик күп ғаиләләр Аҡъярҙа йәшәргә тороп ҡала. Райондың мәҙәни тормошон да билдәләп үткем килә. Бөгөн район мәҙәниәт йорто теләүселәрҙең барыһын да һыйҙырып бөтә алмай. Был - бик ҡыуаныслы күренеш».

Филармония сәхнәһендә Хәйбулла коллективтары үҙҙәренең оҫталығын иҫбатланы. Өфө тамашасыһы алдында «Түңгәүер» халыҡ ҡурайсылар ансамбле, «Ҡош юлы» фольклор ансамбле, Йомабай Иҫәнбаев исемендәге Балалар сәнғәт мәктәбенең «Йондоҙсоҡ», Исмәғил Тасимов исемендәге тау колледжының «Тау гәлсәрҙәре», «Сиҙәм» бейеү ансамблдәре, район мәҙәниәт һарайы солистары һәм башҡа артистар сығыш яһаны.

http://www.bashinform.ru/news/1111659-festival-marafon-k-100-letiyu-respubliki-nachal-khaybullinskiy-rayon/