Санкт-Петербургтағы башҡорт йәштәре Йырҙар кисәһенә йыйылды

ӨФӨ, 2017 йыл, 27 ноябрь. /«Башинформ» мәғлүмәт агентлығы, Ләйлә Аралбаева/. Санкт-Петербургтағы башҡорт йәштәре «Эврика» үҫмерҙәр һәм йәштәр клубына йыйылды. Сараға Башҡортостан Республикаһы мосолмандары Диниә назаратынан мөфтөйҙөң беренсе урынбаҫары Айнур Арыҫланов, «Тархан» көрәшселәр клубы вәкиле Илдар Таймасов, башҡорт эстрадаһының йәш башҡарыусылары Тимур Ямалов һәм Илгиз Абдрахманов ҡунаҡҡа килде. Әле улар Санкт-Петербургта мосолман дин эшмәкәрҙәренең квалификацияһын күтәреү курстарында уҡый.

Айнур Арыҫлановтың сәләмләү һүҙҙәренән һуң ҡалған ваҡыт яратҡан башҡорт йырҙарына, аралашыуға, фотоһүрәттәргә арналды.

«Сара тамамланғас та ҡыҙыҡлы әңгәмә дауам итте, — тип хәбәр итте ойоштороусылар. — Ҡунаҡтарыбыҙға ошо кисәне биҙәгәндәре һәм ойоштороусылар Айгизә Халиҡоваға, Азалия Ғиләжеваға, Әминә Дауытоваға, бина өсөн Эльвира Моталоваға, даими рәүештә ярҙам иткәне өсөн Азамат Түзбәковҡа рәхмәт белдерәбеҙ».

Йырҙар кисәһе һәр саҡ Санкт-Петербургтағы «Аманат» башҡорт йәштәре ассоциацияһының йыллыҡ саралар планына индерелә. Кемдер үҙен ойоштороусы ролендә һынап ҡарай, кемдер музыкант, йырсы булараҡ асыла. Сара рәсми булмаған дуҫтарса шарттарҙа башҡорт йәштәрен берләштерә.