Нефтекама филармонияһы 20 йыллыҡ юбилейын билдәләне

ӨФӨ, 2017 йыл, 31 октябрь. /«Башинформ» мәғлүмәт агентлығы, Ләйлә Аралбаева/. Башҡортостанда Нефтекама дәүләт филармонияһы 20 йыллыҡ юбилейын билдәләне. Байрам сараларында республиканың мәҙәниәт министры Әминә Шафиҡова ҡатнашты, тип хәбәр иттеләр ведомствоның матбуғат хеҙмәтендә. Был кис филармония коллективы «Йөрәгемдең балҡышы» исемле яңы музыкаль программа әҙерләгәйне. Программала опера ариялары һәм эстрада йырҙары, бейеү номерҙары, цирк шоуы булды.

Нефтекама дәүләт филармонияһы – Башҡортостандың филармония коллективтары араһында иң йәше, республиканың төньяҡ-көнбайышында берҙән-бер профессиональ мәҙәниәт һәм сәнғәт учреждениеһы. Филармония төбәктә әүҙем концерт эшмәкәрлеген алып бара, күрше төбәктәрҙә күпләп башҡорт, татар, мари халҡы йәшәгән урындарҙы уратып ала.

20 йыл эсендә коллектив бихисап концерт программаһы әҙерләгән. Бында алты ижади төркөм: башҡорт (етәксеһе Раян Алтыншин), татар (етәксеһе Рифҡәт Ғәбделйәнов), мари (етәксеһе Раисия Иҫәнбаева), цирк бригадалары (етәксеһе Нурания Хәлитова), «Түңгәүер» бейеү ансамбле (етәксеһе Гөлнара Сәфәрова), музыкаль лекторий (етәксеһе Рита Ҡарасурина) эшләй.

Филармонияның коллективы «Дуҫлыҡ моңо», «Урал моңо», «Самоцветы Прикамья», «Чолман йук» кеүек республика концерттарында, төбәк-ара фестивалдәрҙә һәм конкурстарҙа даими ҡатнаша. Филармония артистары йыл һайын бөтә Рәсәй һәм халыҡ-ара сараларҙа, Рәсәй ҡалаларында – Санкт-Петербургта, Мәскәүҙә, Екатеринбургта, Түбәнге Новгородта, Пермдә, Силәбелә, Һарытауҙа, Нижневартовскиҙа, Төмәндә, Ҡурғанда милли Һабантуй байрамдарында ҡатнаша. Коллективҡа Италияла, Төркиәлә, Украинала, Эстонияла, Үзбәкстанда алҡышланылар.