Башҡортостанда Шәйехзада Бабич исемендәге дәүләт республика йәштәр премияһы лауреаттары билдәле булды

ӨФӨ, 2017 йыл, 30 октябрь. /«Башинформ» мәғлүмәт агентлығы, Ләйлә Аралбаева/. Башҡортостанда әҙәбиәт, сәнғәт һәм архитектура өлкәһендә Шәйехзада Бабич исемендәге дәүләт йәштәр премияһы лауреаттары билдәләнде. Был хаҡта республика Йәштәр сәйәсәте һәм спорт министрлығының матбуғат хеҙмәтенән хәбәр иттеләр. Премиялар 2 ноябрҙә тапшырыла.

2015, 2016 йылдарҙа премияға «Өй түбәмдә күгәрсендәр» китабы өсөн Алмас Шаммасов; «Хыялға ҡаршы» спектаклен профессиональ кимәлдә ҡуйғандары һәм башҡорт театр сәнғәтен пропагандалауҙары өсөн Илсур Ҡаҙаҡбаев, Урал Әминев, Ринат Баймырҙин, Артур Кәбиров, Фәнис Рәхмәтовтан торған ижади коллектив һәм хор сәнғәте өлкәһендәге ҡаҙаныштары өсөн Алһыу Хәсбиуллина лайыҡ булды.

Быйыл йәштәр премияһына 15 эш тәҡдим ителде, шуларҙың 10-һы – сәнғәт, дүртәүһе – әҙәбиәт, берәүһе архитектура өлкәһендә. Комиссияның 5 сентябрҙә үткән беренсе ултырышы йомғаҡтары буйынса, конкурста артабан ҡатнашыу өсөн 10 ғариза һайлап алынды.

Белешмә. Шәйехзада Бабич исемендәге премия художестволы әҙәбиәт; һынлы сәнғәт; театр, музыка, эстрада, цирк сәнғәте һәм хореография; кинематография; архитектура өлкәһендәге әҫәрҙәр өсөн тапшырыла. Премия менән бүләкләүҙең төп маҡсаты – Башҡортостан Республикаһының үҫешенә ҙур өлөш индергән йәш яҙыусыларҙы, рәссамдарҙы, артистарҙы, музыканттарҙы, архитекторҙарҙы һәм режиссерҙарҙы дәртләндереү. Премияның күләме 150 мең һум тәшкил итә. Ул ике йылға бер тапҡыр тапшырыла.

22 йыл эсендә премияға 47 автор һәм 12 коллектив лайыҡ булды. Премия лауреаттары араһында опера йырсыһы Зөһрә Байбурина, кинорежиссер Булат Йосопов, композитор Урал Иҙелбаев, ҡурайсы Роберт Юлдашев, яҙыусы Игорь Савельев, йырсы Земфира Рамазанова бар.