Күгәрсен районында Шәһит Хоҙайбирҙин исемендәге премия лауреаттары ағастар ултыртты

ӨФӨ, 2017 йыл, 13 октябрь. /«Башинформ» мәғлүмәт агентлығы/. Башҡортостандың Күгәрсен районында Шәһит Хоҙайбирҙин исемендәге премия лауреаттарын тәбрикләү хөрмәтенә арналған тантаналы саралар уҙҙы. Сәйәси һәм йәмәғәт эшмәкәре, журналистың тыуған төйәгенә Хоҙайбирҙе ауылына журналистика өлкәһендә 2017 йылғы Хөкүмәт премияһы лауреаттары – «Стерлитамакский рабочий» гәзите хәбәрсеһе Марина Воронова, «Башинформ» мәғлүмәт агентлығы күҙәтеүсеһе Ләйлә Аралбаева һәм Башҡорт дәүләт университеты профессоры Фәнил Күзбәков килде.

Шулай уҡ Ш.Хоҙайбирҙин исемендәге район премияһы лауреаттарын бүләкләү тантанаһы уҙҙы. Быйыл уға Журналистар союзы рәйесе урынбаҫары Фәнил Ҡоҙаҡаев һәм «Күгәрсен хәбәрҙәре» гәзитенең ауыл хужалығы бүлеге мөдире Анатолий Казаков лайыҡ булды. Лауреаттарҙы Күгәрсен районы башлығы Ғайса Янбаев ҡотланы. Башҡортостандың Матбуғат һәм киң мәғлүмәт саралары агентлығы етәксеһе Борис Мелкоедов дипломдар һәм иҫтәлекле билдәләр тапшырҙы. Ул үҙ тарихын белгән һәм ҡәҙерләп һаҡлаған, яңыраҡ 40 йыллығын билдәләгән Шәһит Хоҙайбирҙиндың Йорт-музейын юғары кимәлдә тотҡан яҡташтарының ролен айырым билдәләне.

Сарала Башҡортостан Милли музейының Маҡтау грамотаһы менән Хоҙайбирҙиндың Йорт-музейында күп йылдар директор булып эшләнгән Вәсилә Әмирова бүләкләнде. Музейҙы һаҡлаусы Минзәлә Күсербаеваға Күгәрсен районының маҡтау ҡағыҙын тапшырҙылар.

Ҡунаҡтар Шәһит Хоҙайбирҙиндың һәйкәленә сәскәләр һалды, уның Йорт-музейында булды. Район художество үҙешмәкәрҙәре концерт ойошторҙо.

Тантаналы сара сиктәрендә йолаға әүерелгән ваҡиғаларҙың береһе – ул ағас ултырыу. 2017 йылғы лауреаттар номерҙар буйынса 97-99-сы булды, киләһе тапҡыр лауреаттар икенсе йөҙҙө аса. Изге шыршы ултырыу йолаһына күрә Мәҙәниәт йорто янында ҙур ғына парк барлыҡҡа килде.