Радик Юлъяҡшин төркөмдөң тыуған көнөндә үҙенең фанаттарына һөйөүен белдерҙе

ӨФӨ, 2017 йыл, 3 октябрь. /«Башинформ» мәғлүмәт агентлығы, Ләйлә Аралбаева/. Радик Юлъяҡшин (Elvin Grey) үҙенең төркөмөнә туғыҙ йыл тулған көндә бөтә фанаттарына һөйөүен белдерҙе. Ижади биографияһындағы мөһим датаны йырсы Ноябрьскиҙа гастролдәрҙә билдәләй.

Байрам көнөндә Радик социаль селтәрҙә бөтә коллегаларына, администраторҙарға һәм фанаттарға рәхмәт һүҙҙәрен еткерҙе: «Барығыҙҙы ла ҡосаҡлайым, әлгәнйәктәрем минең!».

Киләһе йылда Юлъяҡшин төркөмдөң 10 йыллығы уңайынан ҙур сара ойошторорға вәғәҙә бирҙе.

Видеороликты 26 меңдән ашыу кеше ҡараған да инде.

Радик Юлъяҡшин башҡорт, татар һәм рус телдәрендә йырлай. 2006 йылда тәүге альбомы донъя күрҙе. 2011 йылдан Мәскәүҙә йәшәй һәм Elvin Grey псевдонимы аҫтында сығыш яһай. 2016 йылда Радик Юлъяҡшин «Татарстан мәҙәниәтенең йыл кешеһе» номинацияһында еңеүсе тип танылды. 2006-2012 йылдарҙа йыл һайын «Башҡортостанда йыл йырсыһы» исеменә лайыҡ булды, «Башҡортостанда йыл хиты-2012» номинацияһында Гран-при яуланы, «Мин — артист» Бөтә Рәсәй йәш башҡарыусылар конкурсы финалсыһы. 2017 йылда Радик Юлъяҡшиндың исеме башҡорт теле дәреслегенә индерелде.