Башҡорт сатира оҫтаһы Марсель Сәлимовтың шиғырҙары болгар телендәге антологияла баҫылған

ӨФӨ, 2017 йыл, 7 август. /«Башинформ» мәғлүмәт агентлығы, Әлим Фәйезов/. Болгарияла болгар телендә «Словоприношение» шиғри антологияһы донъя күрҙе. Уның төҙөүсеһе – Славян әҙәбиәт һәм сәнғәт академияһы президенты, билдәле болгар шағирәһе Елка Няголова.

Рәссам Даниэла Зекина биҙәгән шаҡтай ҙур альбомға донъяның 28 иленән славян телендә яҙыусы 194 автор ингән. Рәсәйҙән антологияға 21 шағир тәҡдим ителгән, уларҙың шиғырҙары күп тапҡыр славян телдәренә тәржемә ителгән: улар – Евгений Евтушенко, Андрей Дементьев, Лариса Васильева, Владимир Бояринов, Валентин Сорокин, Николай Переяслов, Надежда Мирошниченко, Валерий Латынин һәм башҡа билдәле авторҙар, улар араһында башҡорт шағиры – сатира оҫтаһы Марсель Сәлимов.

Елка Няголованың тәржемәһендә башҡорт шағирының шиғырҙары антологияның айырым «Башҡортостан» бүлегендә баҫылған. Антологияның инеш һүҙендә Славян академияһы президенты билдәләүенсә, Әрмәнстандан, Дағстандан, Башҡортостандан, Яҡут Республикаһынан, Молдованан һәм Швециянан милли шағирҙарҙың ҙур төркөмө славян шағирҙары менән тығыҙ бәйләнештә эшләй. Билдәле сатириктың һүҙҙәре славян илдәре халыҡтарына мөрәжәғәт булып, уның манускриптында яңғырай: «Хоҙай славяндарҙы бер-береһен туҡмар өсөн түгел, яратыр өсөн барлыҡҡа килтергән». Беҙ барыбыҙ ҙа бөгөн бының ни тиклем көнүҙәк булғанлығын аңлайбыҙ.