«Яңы йондоҙ» телешоуында Башҡортостан исеменән «Zaman» этно-проекты сығыш яһай

ӨФӨ, 2017 йыл, 31 июль. /«Башинформ» мәғлүмәт агентлығы, Ләйлә Аралбаева/. «Zaman» этно-проекты «Яңы йондоҙ» телешоуының өсөнсө миҙгелендә ҡатнаша. Мәскәү коллективы Башҡортостан исеменән сығыш яһай. Проект май айында төшөрөлгән, тапшырыуҙар августа эфирға сыға.

«Май айында отелдә төрлө төбәктәрҙән килгән ҡатнашыусылар менән йәшәнек. Хореографтар, продюсерҙар менән шөғөлләндек, — тип һөйләне «Zaman» төркөмө етәксеһе Радмир Мөфтәхин. — Беҙгә билдәле йырҙы бирҙеләр, әммә беҙ уға милли колорит өҫтәнек. Тиҙҙән үҙегеҙ күрерһегеҙ».

«Яңы йондоҙ» — йыл һайын үткәрелгән Бөтә Рәсәй эстрада йыры телевизион конкурсы, 85 төбәк ҡатнашҡан тарихта тәүге музыкаль бәйге. Илдең иң көслө йырсылары бер сәхнәлә осраша. Уларҙың һәр береһе тыуған төйәге өсөн көрәшә. Музыка өлкәһендә танылған эксперттар иң көслөләрҙе асыҡлай. Финалға сығыусыларҙы һәм еңеүсене тамашасылар билдәләй. Шоуҙың үҙенсәлеге — музыкаль жанрҙарҙың төрлөлөгө: блюз, рок, этник, популяр музыка.