Башҡортостанда Милли симфоник оркестр миҙгел асыу концертын Игорь Стравинскийҙың 135 йыллығына арнаясаҡ

ӨФӨ, 2017 йыл, 14 июль. /«Башинформ» мәғлүмәт агентлығы, Эльмира Сабирова/. Башҡортостан Республикаһы Милли симфоник оркестры яңы 26-сы концерт миҙгелен асыуҙы композитор Игорь Стравинскийҙың (1882-1971) тыуыуына 135 йыл тулыуға арнаясаҡ. «Музыкаль мода закондарын сығарыусы», «мең дә бер стиль кешеһе» − шулай тип уны ижадының ғәҙәти булмаған төрлөлөгө өсөн иҫән саҡта йөрөттөләр.

Башҡортостан Мәҙәниәт министрлығының матбуғат хеҙмәтендә хәбәр итеүҙәренсә, 29 августа «Башҡортостан» дәүләт концерт залында 1949 йылда Стравинскийҙың редакцияһында «Пульчинелла» балетынан Сюита яңғыраясаҡ. «Пульчинелла» балетының музыкаһын композитор Парижда «Рус миҙгелдәре»н асҡан талантлы антрепренёр Сергей Дягилевтың тәҡдиме буйынса яҙа. Балет өсөн сюжетты коллектив – Сергей Дягилев, Игорь Стравинский һәм хореограф Леонид Мясин әҙерләй, һуңғыһы үҙе Пульчинелланы бейей.

Башҡортостан Милли симфоник оркестрының әҙәбиәт бүлегенә билдәләүҙәренсә, концерт киң аудиторияға тәғәйенләнгән һәм Рәсәйҙә Стравинский йылы сиктәрендә тормошҡа ашырыла.

Шулай уҡ асыу концерты афишаһында Александр Глазуновтың Скрипкалы ля минор концерты белдерелгән. Программаны Галзуновтың «Раймонда» балетынан музыкаль өлөштәр биҙәйәсәк.

Пуль артында – оркестрҙың художество етәксеһе һәм баш дирижеры Раушан Яҡупов. Концерт киске сәғәт 7-лә башлана.