Башҡортостан халҡы беренсе башҡорт краудфандинг музыкаль проектының акционерҙары булды

ӨФӨ, 2017 йыл, 13 июль. /«Башинформ» мәғлүмәт агентлығы, Гөлфиә Акулова/. Башҡортостан халҡы беренсе башҡорт краудфандинг музыкаль проектының акционерҙары булды. Аҡса «Бүреләр» рок төркөмөнөң яңы альбомын яҙҙырыу өсөн йыйылды.

2004 йылда Өфөлә ойошторолған төркөм башҡорт телендәге рокты тергеҙгән коллективҡа әүерелде. Үҙенең ижадында «Бүреләр» заманса рок мәҙәниәте менән халыҡ музыкаһы элементтарын берләштерә. Төркөм республика буйлап, Мәскәүҙә, Силәбелә концерттар менән сығыш яһаны, халыҡ-ара фестивалдәрҙә ҡатнашты. Клиптары Turkish Music Box халыҡ-ара музыкаль телеканалында күрһәтелә. Музыкаһы «Башҡортостан» киностудияһының «Минең йондоҙом» фильмына һәм М. Ғафури исемендәге Башҡорт академия драма театрының «Артур+Нэнси» спектакленә ингән. Төркөм интернетта композитор Рим Хәсәнов ижад иткән «Әҡлимә» йырының панк-версияһы менән дә дан алды.

Бөгөн коллективтың иңендә — дебют альбомы, икенсе альбомды яҙҙырыу өсөн музыканттар тыңлаусыларынан ярҙам һораны. Рәсәйҙәге Planeta.ru ҙур краудфандинг платформаһында ике ай самаһы эсендә 139 400 һум аҡса йыйылды, проектты тормошҡа ашырыу өсөн 200 мең кәрәк. Төркөм яңы альбомды Мәскәүҙең иң яҡшы студияларында яҙҙырырға, әҙер эште иһә быйыл октябрь-ноябрь айҙарында ҙур концерт менән билдәләргә ниәтләй.

Төркөмдән рәхмәт һүҙҙәренән тыш, краудфандинг проекты акционерҙары тәүгеләрҙән булып альбомдың һанлы версияһын аласаҡ. Бонустар араһында бүләк CD-баҫма һәм концерттарға билеттар ҙа бар.