Өфөлә Хәтер һәм ҡайғы көнөндә «Помните ли вы нас?» фильмының премьераһы үтә

ӨФӨ, 2017 йыл, 22 июнь. /«Башинформ» мәғлүмәт агентлығы, Ләйлә Аралбаева/. 22 июндә, Хәтер һәм ҡайғы көнөндә, Республика Хәрби Дан музейында «Помните ли вы нас?» документаль фильмының премьераһы үтә.

Режиссер Вилүрә Иҫәндәүләтованың «Башҡортостан» киностудияһының «Помните ли вы нас?» документаль фильмы Бөйөк Ватан һуғышындағы Еңеүгә арналған. Унда Көйөргәҙе районының Кинйәабыҙ ауылы халҡы тураһында бәйән ителә. Емельян Пугачевтың арҡалашы Кинйә Арыҫланов нигеҙ һалған ошо бәләкәй ауылдан 62 кеше һуғыш йылдарында фронтҡа китә. Уларҙың күптәре кире әйләнеп ҡайтмай. Өсәүһе Советтар Союзы Геройы исеменә лайыҡ була. Ул – Ғәфиәтулла Арыҫланов, Сәлмән Биктимеров һәм Хәсән Ғайсин. Улар төрлө фронттарҙа һуғышып, батырлыҡ һәм ҡаһарманлыҡ өлгөһөн күрһәтә.

Фильмда Советтар Союзы Геройы Ғәфиәтулла Арыҫлановтың туғаны Федераль именлек хеҙмәтенең отставкалағы полковнигы, хәҙер Яҡын һәм Урта Көнсығыш проблемалары буйынса белгес Рудик Исҡужин ҡатнашты.