Башҡортостан юлдаш телевидениеһының тапшырыуҙарын Ҡытайҙа күрһәтәсәктәр

ӨФӨ, 2017 йыл, 20 июнь. /«Башинформ» мәғлүмәт агентлығы, Ләйлә Аралбаева/. Башҡортостан юлдаш телевидениеһының тапшырыуҙарын Ҡытайҙа күрһәтәсәктәр. Ҡытайҙа «Башҡортостан» медиахолдингы менән Аньхой телекомпанияһы араһында тейешле килешеүгә ҡул ҡуйылды. Был — Рәсәй-Ҡытай мөнәсәбәттәре тарихында ошондай форматтағы беренсе документ. Яҡтар киске эфирҙа урын алған видеоматериалдарҙы ебәрәсәк. Ҡытай тамашасыларында Башҡортостандың туристик һәм иҡтисади ҡеүәте, шулай уҡ республикабыҙҙа йәшәүселәрҙең көнкүреше һәм мәҙәниәте хаҡында тапшырыуҙар ҙур ҡыҙыҡһыныу тыуҙырған. Бындай хеҙмәттәшлек дәүләт-ара партнерлыҡты ла нығытасаҡ.

«Беҙҙең берләшеп йәки уртаҡ көс менән ҙур һөҙөмтәләргә өлгәшә алыуыбыҙҙы аңлау өсөн, шул иҫәптән сауҙа-иҡтисад өлкәһендә лә. Был бик мөһим ваҡиға. Башҡортостан юлдаш телевидениеһы Рәсәйҙә Ҡытай телекомпанияһы менән ошондай юғары кимәлдә етди килешеү төҙөгән тәүге төбәк телеканалы булды», — тип аңлатма бирҙе ҡул ҡуйылған килешеүгә «Башҡортостан» ТРК ДУП-һы директоры Рөстәм Зәрәфетдинов.