Баш ҡалала «Туғанлыҡ» фестивале жюрийын билдәле Рәсәй актеры Евгений Князев етәкләйәсәк

ӨФӨ, 2017 йыл, 8 июнь. /«Башинформ» мәғлүмәт агентлығы, Ләйлә Аралбаева/. VI «Туғанлыҡ» халыҡ-ара төрки телле театрҙар фестивале жюрийын танылған театр, кино һәм телевидение актеры, театр педагогы, Борис Щукин исемендәге Театр институты ректоры, Рәсәйҙең халыҡ артисы Евгений Князев етәкләйәсәк (Мәскәү). Жюри составында шулай уҡ күренекле сәнғәт эшмәкәрҙәре — билдәле режиссер, М. Горький исемендәге Ырымбур өлкә драма театрының художество етәксеһе, Рәсәйҙең халыҡ артисы һәм атҡаҙанған сәнғәт эшмәкәре Рифҡәт Исрафилов (Ырымбур); драматург, Төрөк яҙыусылары союзы идараһы рәйесе Тунджэр Джюдженоглу (Төркиә); Х. Намсараев исемендәге Бүрәт академия драма театрының художество етәксеһе, Бүрәтстандың халыҡ артисы, Рәсәйҙең атҡаҙанған мәҙәниәт хеҙмәткәре Эржена Жамбалова (Улан-Удэ) һәм легендар актриса, СССР-ҙың халыҡ артисы Гөлли Мөбәрәкова (Өфө) эшләйәсәк.

Фестивалдең тәнҡитселәр коллегияһына театр тәнҡитсеһе, «Литературная газета» баҫмаһының бүлек мөдире, «Алтын битлек» премияһының эксперттар советы ағзаһы Александр Вислов (Мәскәү); театр тәнҡитсеһе, Сәнғәт һәм мәҙәниәт институты доценты, «Алтын битлек» премияһының эксперттар советы ағзаһы, Рәсәйҙең атҡаҙанған мәҙәниәт хеҙмәткәре Татьяна Тихоновец (Пермь); театр тәнҡитсеһе, филология фәндәре докторы, профессор, Рәсәй юғары мәктәбенең атҡаҙанған хеҙмәткәре, Рәсәй театр сәнғәте университетының (ГИТИС) тарих, философия, әҙәбиәт кафедраһы мөдире Андрей Ястребов (Мәскәү); театр тәнҡитсеһе, Ғ. Камал исемендәге Татар театрының әҙәби бүлеге мөдире Нияз Иғламов (Ҡазан); театр белгесе, сәнғәт фәне кандидаты, З. Исмәғилев исемендәге Өфө дәүләт сәнғәт институты доценты, Башҡортостандың атҡаҙанған сәнғәт эшмәкәре Галина Вербицкая (Өфө) саҡырылған.

7-14 сентябрҙә Өфөлә VI «Туғанлыҡ» халыҡ-ара төрки телле театрҙар фестивале уҙғарыла. Аҙна буйына биш майҙансыҡта төрлө илдәр һәм республикаларҙың — Ҡаҙағстан, Ҡырғыҙстан, Төркиә, Азербайжан, Башҡортостан, Татарстан, Сыуашстан, Дағстан, Алтай, Ҡабарҙа-Балҡар, Тыва, Хакасия театрҙарының 14 спектаклен күрһәтеү ҡаралған. Фестивалдең тулы программаһы — бында.