Өфөлә «Рәсәй – минең тарихым» тарихи паркын ойоштороу буйынса эштәр тамамлана

ӨФӨ, 2017 йыл, 7 июнь. /«Башинформ» мәғлүмәт агентлығы/. 6 июндә «ВДНХ-Экспо» күргәҙмәләр комплексында Башҡортостан Башлығы Рөстәм Хәмитов «Рәсәй – минең тарихым» мультимедиалы тарихи паркты ойоштороу буйынса эштәр барышы менән танышты.

Парктың экспозицияһына 7000 квадрат метрҙан ашыу майҙанда урынлашҡан яҡынса 500 берәмек мультимедиалы техника инәсәк һәм заманса технологиялар ярҙамында илебеҙҙең мең йыллыҡ тарихын күрһәтәсәк.

Башҡортостан Рәсәйҙең баш ҡалаһынан һуң тарихи парк ойошторолған тәүге төбәк буласаҡ. Өфөләге күргәҙмәнең үҙенсәлеге – Рәсәй һәм Башҡортостан тарихының тығыҙ бәйләнеше. Бында башҡорт халҡының күп быуатлыҡ тарихы хаҡында һөйләүсе видеопроекцион коллаждар, Өфө кремленың өр-яңы 3D-реконструкцияһы, тыуған төйәктең тәбиғи байлыҡтары тураһында мультимедиалы китап тәҡдим ителәсәк. Төбәктең күп конфессиялы тарихына арналған мультимедиа йөрөтөүселәре мөһим урын аласаҡ.

Әлеге ваҡытта төҙөлөш-монтаж эштәре тамамланған, проекция һәм тауыш ҡорамалдары урынлаштырыла. Атап әйткәндә, 140 touch-панель һәм 80-дән ашыу проектор ҡуйыу күҙаллана. Белгестәр контентты тултырыу һәм уны Мәскәүҙәге үҙәк сервер менән синхронлаштырыу өҫтөндә эшләй.