Башҡортостандың Милли симфоник оркестры коллективын яңы художество етәксеһе менән таныштырҙылар

ӨФӨ, 2017 йыл, 2 июнь. /«Башинформ» мәғлүмәт агентлығы, Ләйлә Аралбаева/. 1 июндә республиканың мәҙәниәт министры урынбаҫары Шамил Абдраҡов Милли симфоник оркестр коллективын яңы художество етәксеһе менән таныштырҙы. Ул – коллективта 2015 йылдан эшләүсе оркестрҙың баш дирижеры Раушан Яҡупов. Хәтерегеҙгә төшөрәбеҙ, алдан оркестрҙы Өфөнөң билдәле скрипкасыһы Алексей Воронин етәкләне.

Раушан Яҡуповты тәғәйенләү Башҡортостан Милли симфоник оркестрының 25 йыллыҡ юбилейы менән тап килде. Яңы вазифала эш башлап, етәксе коллективтың үҫеш алыу осорона аяҡ баҫыуын билдәләне. Әлеге ваҡытта оркестр «Евразия йөрәге» халыҡ-ара фестивале сиктәрендә асыҡ һауалағы ҙур концертҡа әҙерләнә. Оркестрҙың музыка өлөшө мөдире Эльмира Ижболдина хәбәр итеүенсә, республиканың төп ижади коллективы сирек быуатлыҡ юбилейын көҙгөһөн билдәләй.