«Мәскәү дуҫтарын ҡаршылай» фестивалендә Башҡортостандан ике йырсы сығыш яһай

ӨФӨ, 2017 йыл, 30 май. /«Башинформ» мәғлүмәт агентлығы, Ләйлә Аралбаева/. «Мәскәү дуҫтарын ҡаршылай» XIV халыҡ-ара фестивалендә Башҡортостандан ике йырсы – Нефтекаманан Влада Косых һәм Өфөнән Рәмил Мөхәмәтшин сығыш яһай. Икеһе лә 2016 йылдың октябрендә Владимир Спиваков исемендәге хәйриә фонды ярҙамында республиканың 11 ҡала-районында уҙған «Моң тылсымы» фестиваль-конкурсы лауреаттары.

Башҡортостан Мәҙәниәт министрлығының матбуғат хеҙмәтендә хәбәр итеүҙәренсә, «Мәскәү дуҫтарын ҡаршылай» фестивале илебеҙҙең баш ҡалаһында 29 майҙа башланды. Сарала Рәсәйҙең 50 төбәгенән һәм 38 илдән солистар, ансамблдәр һәм ижади коллективтар ҡатнаша. Унда 1500-ҙән ашыу һәләтле бала йыйыла. Концерттар Мәскәүҙең иң ҙур майҙансыҡтарында: Музыка йортонда, Рәсәйҙең Ҙур театрында, П.И. Чайковский исемендәге Концерт залында, А.С. Пушкин исемендәге Дәүләт һынлы сәнғәт музейында үтәсәк. Фестиваль 9 июнгә тиклем барасаҡ.