Башҡортостан башланғысы менән Ҡырымда ике республиканың артистары ҡатнашлығында фестиваль уҙғарыла

ӨФӨ, 2017 йыл, 29 май. /«Башинформ» мәғлүмәт агентлығы, Ләйлә Аралбаева/. Башҡортостан башланғысы менән Ҡырымда ике республиканың артистары ҡатнашлығында «Рәсәйгә ант биреп» фестивале уҙғарыла. Сараны 8 июлдә Башҡортостан шефлыҡҡа алған Белогорск районында ойоштороу күҙаллана. Был турала Башҡортостандың мәҙәниәт министры Әминә Шафиҡованың һүҙҙәренә һылтанма яһап, РИА Новости агентлығы (Ҡырым) хәбәр итә.

Фестиваль масштаблы буласаҡ, тип билдәләне министр. Ул Башҡортостан һәм Ҡырым ғалимдары ҡатнашлығында ғилми-ғәмәли конференция менән асыласаҡ. Сара хәрби тарихҡа, Башҡортостандың Рәсәй составына инеүенең 460 йыллығына һәм Ҡырымдың Рәсәйгә ҡушыла башлауының 245 йыллығына арнала. Көндөң икенсе яртыһында Белогорск майҙанында Ҡырымдың ижади көстәре һәм Башҡортостан сәнғәт оҫталарының концерты, кисен Белогорск халҡына «Өфөнән һөйөү менән» тигән яңы башҡорт фильмын күрһәтеү ҡаралған.

Башҡортостан менән Ҡырым араһында төрлө өлкәләрҙә хеҙмәттәшлек тураһындағы килешеүгә өс йыл элек ҡул ҡуйылғайны. Ошо йылдар эсендә төбәккә даими ярҙам күрһәтелде, байтаҡ мәҙәни саралар үткәрелде. Ҡырымдағы хәрби һәйкәлдәр Башҡортостанда йыйылған аҡсаға тергеҙелде. Министр һүҙҙәренсә, быйыл Башҡортостандың дәүләт академия рус драма театры ла Ҡырымға гастролгә барырға йыйына.