Салауат башҡорт театры «Золушка» спектакленең премьераһына саҡыра

ӨФӨ, 2017 йыл, 24 май. /«Башинформ» мәғлүмәт агентлығы, Ләйлә Аралбаева/. 27 майҙа Салауат башҡорт драма театрында Дмитрий Голубецкийҙың Ш. Перро һәм ағалы-ҡустылы Гриммдарҙың әкиәттәре буйынса «Золушка» спектакленең премьераһы уҙа. Тамашасыларҙы иң яратҡан әкиәттәрҙең береһенең персонаждары менән осрашыу көтә. Спектакль рус телендә ҡуйыла, ул көндөҙгө сәғәт 12-лә башлана.

Балда гәлсәр туфлийының һыңарын юғалтҡан Золушка исемле бер ярлы ҡыҙ тураһында һәйбәт һәм тулҡынландырғыс тарих романтик әкиәт донъяһын асасаҡ. Унда тылсымлы таяҡ менән мөғжизә барлыҡҡа килә. Әлбиттә, төп мөғжизә әкиәт геройҙарының йөрәгендә хасил була. Сөнки һәр кем эстән генә теләктәрҙең тормошҡа ашырына, принцтың Золушканы табырына, ә изгелек һәм хеҙмәттең лайыҡлы баһа алырына ышана.

Ҡуйыусы режиссер – Лиана Ниғмәтуллина, костюмдар буйынса рәссам – Гүзәл Шәрәфиева, сәхнә биҙәлеше өҫтөндә эшләүсе – Лилиә Байғужина, композитор – Альбин Столяров, хореограф – Лилиә Зәйнишева. Ролдәрҙә: республиканың атҡаҙанған артистары Нәүфилә Яҡупова, Фәтих Ҡолһарин, Гөлфирә Сафиуллина, Наҙгөл Иҫәнбаева, шулай уҡ театрҙың талантлы йәштәре Нәркәс һәм Мираҫ Йомағужиндар, Рәмзиә һәм Рафаэль Ғәйнуллиндар, Айһылыу Лоҡманова, Риф Мусин, Радик Ғәлиуллин, Лиана Ниғмәтуллина һәм Әмир Үтәбаев.