Төбәктә Ҡурай байрамында Юнир Һағынбаев иң яҡшыһы булды

ӨФӨ, 2017 йыл, 22 май. /«Башинформ» мәғлүмәт агентлығы, Ләйлә Аралбаева/. Башҡортостанда Ғата Сөләймәнов исемендәге Ҡурай байрамында иң яҡшы башҡарыусыға 100 мең һумлыҡ төп бүләкте тапшырҙылар. Уға Өфө ҡалаһынан 29 йәшлек «Мираҫ» фольклор йыр һәм бейеү ансамбле солисы Юнир Һағынбаев лайыҡ булды. Еңеүсе хәбәр итеүенсә, ул бүләген артабан үҫешеүгә тотонорға ниәтләй, яңы үҙенсәлекле сәхнә костюмына заказ бирер, моғайын.

«Тәүге турҙа «Шарлы урман» башҡорт халыҡ йырын уйнаным. Конкурстың шарттарына ярашлы, икенсе турҙа беҙ билет алырға һәм сыҡҡан 100-ҙән бер көйҙө башҡарырға тейеш. Миңә «Ҡырҡты кәкүге» йыры эләкте. Бөтәһен ятлап, үҙ көсөмә ышанһам да, барыбер тулҡынландым һәм еңеүсе булырмын тип уйламаным», — тине Юнир Һағынбаев.

Ошо көндәрҙә Октябрьский ҡалаһында Ғата Сөләймәнов исемендәге традицион республика ҡурай байрамы тамамланды. Ҡурай байрамында иң өлкән башҡарыусы Сабирйән Байназаровҡа – 67, иң кесеһе Өфөнән Искәндәр Фәйзуллинға ни бары алты йәш ине.