Башҡортостан һәм Өфө яңылыҡтары
77.36
+0.67
87.59
+0.69
86.68
+0.41
-18 °C
Болотло
Бөтә яңылыҡтар
Мәҙәниәт
18 Май 2017, 15:46

Силәбе өлкәһендә башҡорт халҡының рухи мираҫына арналған саралар ойошторола

ӨФӨ, 2017 йыл, 18 май. /«Башинформ» мәғлүмәт агентлығы, Ләйлә Аралбаева/. Силәбе өлкәһендә башҡорт халҡының рухи мираҫына арналған саралар уҙғарыла. Был хаҡта Бөтә донъя башҡорттары ҡоролтайының Башҡарма комитеты хәбәр итә. 19 майҙа Ҡоншаҡ районының Ибраһим һәм Ҡоншаҡ ауылдарында урындағы билдәле эшмәкәр Дарвин Таһировты иҫкә алыу саралары ойошторола. Ул оҙаҡ йылдар Ибраһим мәктәбендә уҡытыусы, директор булып эшләгән. Райондың әҙәби берләшмәһе ағзаһы булған, 12 китап сығарған. Ҡадир Даян исемендәге әҙәби премия лауреаты. Урындағы Башҡорт ҡоролтайы эшендә әүҙем ҡатнашҡан, милли мәҙәниәтте үҫтереүгә ҙур өлөш индергән.
Ошо уҡ көндә Сосновка районының Долгодеревенское ауылы Мәҙәниәт йортонда Сосновка районындағы Башҡорт ҡоролтайының конференцияһы үткәрелә. Йәмәғәт ойошмаһы рәйесе Раил Ғәбитов отчет менән сығыш яһаясаҡ. Ултырышта шулай уҡ Сосновка ҡоролтайының — 20 һәм Башҡорт автономияһының 100 йыллығына бағышланған саралар планы ҡараласаҡ.
20 майҙа оло-ҡатай ырыуы вәкилдәре Ҡоншаҡ районының Түләк ауылында йыйын үткәрә. Ойоштороусыларҙың береһе, урындағы имам-хатип Рәшит хәҙрәт Зыяев әйтеүенсә, «Башҡорт халҡының рухи мираҫы» тип аталған тантаналы сара Силәбе өлкәһе башҡорттарын берләштереүгә, милли мәҙәниәтте, йолаларҙы һаҡлауға һәм үҫтереүгә йүнәлтелгән.
Оло-ҡатайҙар Башҡортостан вәкилдәрен — танылған ғалим, телсе һәм әҙәбиәтсе Рәшит Шәкүрҙе, йәмәғәт эшмәкәре Ләлә Биишеваны, драматург Сәрүәр Суринаны һәм Силәбе өлкәһенең Өфөләге яҡташтар ойошмаһы ағзаларын ҡунаҡҡа саҡырған. Бөтә сараларҙа ла Бөтә донъя башҡорттары ҡоролтайы вәкиле, аппараттың баш белгесе Алһыу Сирғәлина ҡатнаша.