«Тамыр» телеканалының «Ҡымыҙ юлы» проекты Рәсәйҙең «МедиаБренд» телеконкурсы исемлегенә инде

ӨФӨ, 2017 йыл, 17 май. /«Башинформ» мәғлүмәт агентлығы, Ләйлә Аралбаева/. «Тамыр» балалар һәм үҫмерҙәр телеканалының «Ҡымыҙ юлы» проекты V «МедиаБренд» танытыу һәм дизайн телевизион конкурсы исемлегенә инде һәм хәҙер «Төбәк телевидениеһының иң яҡшы проморолигы» номинацияһында еңеүгә дәғүә итә ала.

«Тамыр» телеканалы өлкәндәрсә сифатлы һәм профессиональ төшөрөлгән балалар тапшырыуҙары менән республика брендтарын киң танытыуға лайыҡлы өлөш индерә», — ти «Башҡортостан» ТРК ДУП-һы матбуғат секретары Люциә Дәүлиева.

Тәҡдим ителгән эштәр ике этапты үтә. Тәүгеһе — «ҙур жюриҙың баһаһы» тип аталғаны тамамланған, исемлек төҙөлгән. Артабан эксперттар абсолют лидерҙарҙы билдәләй. Еңеүселәрҙең исеме 14 июндә Мәскәүҙә бүләкләү тантанаһында иғлан ителә.

Былтыр «Шүлгәнташ» фильм-әкиәтенең проморолигы «МедиаБренд» халыҡ-ара конкурсында призлы урын яуланы. «Тамыр» балалар телеканалы икенсе премия лауреаты булды. «Ҡымыҙ юлы» проекты өсөн дә был Рәсәй кимәлендәге беренсе еңеү түгел. Тапшырыу II «Федерация» Бөтә Рәсәй телевизион конкурсының махсус призына лайыҡ булды. «Тамыр» телеканалының «Ҡымыҙ юлы» Ҡазанда «Төрлө Рәсәй» конкурсында «Киң мәғлүмәт сараларында балалар-үҫмерҙәр мәғрифәтселек проекттары» номинацияһында I урынды алды.